Langi Sleði og Sokkarnir

...hárgreiðslustelpan

2009-08-25T20:35:00.002Z

...Langi Sleði fór í klippingu í dag.
Klipparinn var ung stúlka, sem horfði líklega meira á sjálfa sig í speglinum en hárið á Langa sleða.
Umræðurnar snérust fljótlega upp í spjall um daglegt líf. Eftir að hún hafði tjáð sig um ömurlega stráka á menningarnótt, sem leyfðu henni ekki að fara framfyrir í leigubílaröðinni, þó hún væri á 15 cm hælum, iðaði Langi Sleði í skinninu að vita meira um þessa... þessa gleðipinna geluðu plastkonu!
Hún var nú samt ekki á því að ræða frekar sína einkahagi og fljótlega barst talið að kreppunni.

Hún: Já, þessir útrásarkvótar eru náttlega ömurlega ógisslegir.
Langi Sleði: Greifar.
Hún: Eru til greifar á Íslandi?
Langi Sleði: Nei, þeir eru kallaðir "útrásargreifar", ekki útrásarkvótar?
Hún: wotever.
Langi Sleði: Annars finnast mér íslendingar nú vera afar duglegir að barma sér.
Hún: Ha!
Langi Sleði:(örlítið hærra) Duglegir að BARMA sér!
Hún: Erum við að tala um brjóst?
Langi Sleði: Nei, íslendingar hafa verið duglegir að kvarta í kreppunni!
Hún: Já.
Langi Sleði hafði hemil á sér að fara að tala fornt mál við stúlkuna...
... það verður gert næst og krefst undirbúnings.
Gæti verið að Langi Sleði þurfi að fjárfesta í litun ef hann nær að safna miklu efni.

Góðar stundir
Langi Sleði

...bankamannadrama

2009-05-23T11:14:00.002Z

...hitti háttsetta bankamenn nú um daginn. Það er frekar óþægileg reynsla, þegar menn með fyrrum íturvaxna sjálfsímynd, reyna að mæta manni með sama yfirlæti og fyrir hrun.
Langi Sleði horfði til baka með stingandi augnaráði og reyndi að segja; "Ég veit að þið eruð hræddir um óhreina mjölið í pokahorninu ykkar"!
Þess vegna vil ég segja ykkur frá því, hvert hlutverk banka er!
Hlutverk banka er að verja óskiptum höfuðstóli sínum til að lána fólkinu og atvinnulífinu í landinu. Sjá afar áhugaverða þingsályktunartillögu hér.
Ó.
Þannig að bankarnir voru í raun ekki bankar heldur, breyttu þeir sér í fjárfestingafélög... með peningana þína!...
Bigtime.
Kenningin mín er þannig að þeir hafi nú séð bankahrunið fyrir. Ekki vikum, ekki mánuðum heldur líklega allt að árum áður en það gerðist.
Það var allt gert til að fá meira fjármagn inn í bankana.
Nú vil ég segja ykkur frá minni kenningu hvað varðar evrulánin ...lömbin mín.
Þetta var náttúrulega slátrun... þið sáuð bara ekki sláturhúsamerkið.

Maður tekur bankalán í evrum að upphæð 10 Mkr á genginu 1 EUR= 85 ISK
Bankinn veit að evran er að fara að hækka. Greiðir upp lánið þitt og bíður átekta.
Lánið er til 10 ára og þú færð það á súpervöxtum 5%.
Heildarvaxtakostnaður verður rétt rúmlega 2,7 milljónir sem þú þarft að borga.

Nú hækkar evran í 170 kr og þá ert þú kominn í annan bransa (tímabundið)
Allt í einu skuldar þú 20 milljónir + vexti sem verða rúmar 5,5 milljónir.

Segjum að bankinn hafi tekið þennan séns. Þá er hann að græða á láninu þínu.
25,5-10= 15,5 milljónir. Það er aðeins betri ávöxtun en bara þessar 2,7 milljónir sem stóðu til boða fyrst.

Myndi þetta vera löglegt?...
Líklega já...
Bankinn þinn var nefnilega ekki að hugsa um hag þinn, heldur var þetta fjárfestingabanki í áhættufjárfestingum... og tryggingafélagið líka...Já og lífeyrissjóðurinn.

hahhahahhhahahhah ...við erum svo %&$#

Góðar stundir
Langi Sleði

...illu er best af lokið

2008-11-11T20:47:00.003Z

...og nei... ég er ekki að tala um afar lélegar heimtur lesenda af bloggi mínu síðustu mánuði.
Ég veð í þeirri villu að það sé lesendum nauðsynlegt að vita hvað Langi Sleði hefur um málið að segja.
Til að gera þetta verkfræðingslega og skýrt í sömu mund ætla ég að reyna að skipta þessu upp í nokkra hluta.
1. Fólk er mjög reitt vegna tveggja hluta:
a) Bankarnir og vitleysisgangur stjórnvalda er búið að kosta íslensku þjóðina gríðarlega mikla peninga.
b) Innistæður einstaklinga hafa rýrnað og jafnvel horfið (þá er ég bæði að tala um hlutabréf og peninga).
Ástandið er ekki flóknara en þetta. Við megum alveg vera reið það er okkar réttur.

2. Eftirfarandi spurningum þarf að svara til að byrja með:
a) Af hverju þarf "ég" sem neytandi að borga skuldir bankanna?
b) Hvert fóru allir peningarnir sem bankarnir "sögðust" eiga?
c) Af hverju fékk þetta að gerast?
d) Hvað gerist núna?
e) Hvað gerist næst?
e) Hvað gerist svo?
f) Hverskonar banki er Icesave ef allir peningar þar eru horfnir?

Í raun og veru er þetta bara ein spurning og því svarið bara eitt. Við þurfum peninga og alveg helling af þeim.
Hins vegar eru mörg undirsvör og kröfur á þær því nauðsynlegar. Þar má nefna spillingamál, ábyrgðir o.s.frv. Geymum það til síðari tíma.

Kaffipása hjá þér!

4. Hvaða peninga og hvernig fáum við þá er viðfangsefnið!
Svarið her er í raun og veru mjög fyndið. Það vita ALLIR einstaklingar að skuldirnar eigi að vera í sömu mynt og launin eru. (dæmi: Innlend versus erlend bílalán). Sérstaklega þegar gengisáhættan er orðin svona mikil.

Og af hverju er gengisáhættan orðin mikil?
Það er öllum sama um íslensku krónuna. Hún var bara vinsæl á meðan erlendir verslunarmenn gátu gamblað með hana og grætt á henni. Útlendingar keyptu jöklabréf hægri vinstri. Auk þess var veltan á hlutabréfamarkaðnum, að megninu til íslensk innherjaviðskipti sem sneru mest að flutningi frá a til b frá b til c frá c til d og frá d til a.
Bankainnherjaviðskiptin voru hins vegar skrefstyttri.... svona eins og dvergar eru almennt.
Þess vegna hélst gengið hátt.
Það er vegna þess að við erum skítasker norður í hafi og höfum rænt og ruplað frá upphafi vega!
(t.d. hefur ekki enn fæðst fallegur íri, frá því að við stálum öllum fegurðargenunum þeirra og það er orðin rúmlega aldarkreppa).

Allavegana... vegna þess höfuðlausa hers sem hér hefur óstjórnað (og ég er ekki að segja að ég vilji nýja stjórn þvi ég sé fyrir mér í raun aðeins einn stjórnmálamann nú í dag sem enn heldur einhverri sjálfsvirðingu og það er enginn stjórnmálamaður sem hefur getuna til þess að taka við).

Allavega sagan segir að okkur vanti 6 milljarða evra til að breyta í krónur og á að greiðast tiltölulega fljótt (reyndar þá fáum við lán einhvers staðar annars staðar frá).
Hins vegar er ÖLLUM heiminum sama um krónuna og því og þess vegna megum við ekki halda í þennan gjaldmiðil.
Ástæðan er sú að eftir tvö ár gæti staðan hér verið mun verri en nú.
6 milljarðar evra gætu verið orðin 20 milljarðar evra... eða jafnvel enn hærri í íslenskri mynt.

Já við þurfum að taka upp evru... því miður...þó ekki væri nema að tryggja að stórt lán yrði gígantískt.
Því fyrr sem menn átta sig á því, því betra...
Einhliða upptaka evru yrði mjög auðveld. Ég myndi t.d. treysta mér til að nota aðeins greiðslukort ... fyrsta árið.
Ég ætla ekki í smáatriðin hér enda ekki partur af þessum ritlingi... og þetta líklega bæði leiðinlegt og illa skrifað.

góðar stundir
Langi Sleði

...stjáklað skælandi í skálkaskjóli skrumsins

2008-08-22T22:34:00.002Z

...æ.
Elísabet er þessa dagana að auglýsa "nútíma bílalán".
Þar sem það þýðir eitthvað gott en órætt þótti Langa Sleða forvitnilegt að fá þýðingu á "nútíma". Á mannamáli þýðir það að þeir eru hættir að tryggja litla kraftmikla bíla, þar sem slysatíðnin er hæst. Langi Sleði veit ekkert hvort að þetta sé löglegt, þar sem hér er um hreina og klára mismunun að ræða. Langa Sleða þótti það frekar broslegt, þar sem Austin Mini er andlit fyrirtækisins og samkvæmt nýju reglunum ætti ekki að vera hægt að tryggja svoleiðis bíla hjá fyrirtækinu.
Það er svona eins og það væri bannað að kaupa hamborgara á hamborgarabúllunni.
...ææ
Það er makalaust hvað þessir stjórnmálamenn eru tilbúnir að baða sig í glæsilegu gengi handboltastrákanna okkar. Ég gæti ælt. Eins gæti ég ælt á borgarmálin en ég hef mig ekki í að tala um þau hér.
Ég er yfir það hafinn að eyða tímanum eða yfir höfuð að yrða á svona fólk.
Einhvern veginn verður að búa til þverpólitíska samstöðu til að losna við þessa ræfla. Þetta eru eins og rottur að yfirgefa brennandi hús. Allar eru þær með eldspýtur á sér og allar benda þær á hvora aðra. Ein rotta var látin leika lystir sínar með eldspýtur og er með skaðbrenndan feld en það gerði víst lítið til þar sem kleprarnir voru þegar komnir á. Krullaða rottan sem opnaði eldspýtustokkinn galar nú: "ég sagði ykkur að opna ekki eldspýtustokkinn". Það er að vísu bara ein rotta sem misskildi þetta allt saman og hélt að hún væri að yfirgefa sökkvandi skip og stökk því fyrir borð í Edinborg og sagðist ætla að fara að "læra". Spurningin er hvort þar hafi komið nafn á fyrst bindi ævisögunnar hans "Af mistökum!".

Góðar stundir
Langi Sleði.

...margverkamaður og kraftaverkamaður

2008-08-19T23:15:00.003Z

...hugsaði Langi Sleði þegar hann hlustaði á nýjustu plötu Megasar.
Þegar hugurinn reikaði um öngstræti gamalla texta og laga í fylgd Megasar og senuþjófanna mætti plötudómurinn óumbeðinn í huga Langa Sleða.

Stundum þegar Megas yrkir ekki þá hefur hann heldur ekki getað setið á strák sínum og fært textann í klúrt form.
Stundum hins vegar gerir hann þetta allt þrennt í einu.
Það gerir hann að margverkamanni (múltítaskara).

Það að skila undantekningalaust góðum plötum til almennings gerir hann að kraftaverkamanni (m.v. að hinn almenni poppari sé skilgreindur sem venjuleg manneskja sem er í raun mjög hæpin fullyrðing).
Byggt á þessari hæpnu fullyrðingu og hetjuformi nútímans, má segja að Megas sé Batman okkar íslendinga.

Góðar stundir
Langi Sleði

...brumbolt

2008-07-23T18:12:00.002Z

...Langi Sleði var staddur á einum virtasta fundarstað Reykjavíkurborgar, nánar til tekið á Kaffivagninum.
Þar sat Langi Sleði ásamt heiðursmanni yfir rjúkandi kaffibolla og elegant smurbrauði og ræddum málefni líðandi stundar, líkt og trillukarlarnir fyrr um morguninn.
Staðurinn ber þess glöggt merki að háglans sjómennskunnar er aðeins minning veðurbarðra ellilífeyrisþega, sem reyrðu seglstakka og fóru í lopavettlinga með tveimur þumlum. Þeir allra elstu vita meira að segja enn af hverju þumlarnir voru tveir.
Kaffistamparnir, þótt hreinir séu, hverfa reglulega inn í ægilega hramma þessara hetja sem buðu veðuröflunum byrginn til að sjá sér og sínum farborða.
Uppnuminn og andaktugur yfir höfgi þessa staðar, rann manni skylda til blóðsins að tala með djúpum rómi og láta karlmannlega fram úr hófi.
Strákpjakkur sem hefði varla getað verið léttadrengur á áttæringi, nálgaðist Langa-Sleða.
pjakkur: "Halló, ertu búinn með moggann?"
pjakkur: "Er þetta mogginn í dag?"
Þá drundi í Langa Sleða: "Já og hér eru meira að segja tvö eintök...og þú skalt taka þau bæði... svona ef annað bilar"
Pjakkurinn rak upp stór augu og spurði: "hvernig ætti blaðið að bila?"
Langi Sleði (með dimmrödduðum þjósti eins og bjánaleg spurning léttadrengs átti skilið að fá): "Ég veit það ekki, ég hef aldrei lent í því að blað bili, en það sem hefur aldrei komið fyrir áður, getur alltaf komið fyrir aftur! "
Pjakkurinn var nú kominn með augu á stærð við undirskálar og
bakkaði varfærnislega út úr samtalinu með því að halda báðum eintökum moggans þétt upp að hárlausu brjósti sér.
Hann kom sér fyrir í hinum enda salarins en sóttist lesturinn seint enda hafði hann annað augað enn á Langa Sleða.
Einum beitarbala síðar, kvöddust Langi Sleði og heiðursmaðurinn með hrammahandarbandi og héldu í átt að sitt hvorum borðanum.
Léttadrengurinn hafði fengið mjólk og kleinu og var að skoða skrípóið í blaðinu.
Langi Sleði kvaddi hann með því að lyfta höfuðfatinu til hálfs enda pjakkurinn ekki hálfdrættingur og líklega bara rétt rúmlega amlóði.

Góðar stundir
Langi Sleði

...skylduáhorf

2008-07-19T13:34:00.003Z

...þó að Egill Helga hafi sína galla og þetta myndband sé ekki með öllu gallalaust, þá er það skylduáhorf.

Svona býr maður til peninga... og stelur af öðrum.

þetta er alveg eins og dæmisagan um 5 ára strákinn sem beið í ofnæmi eftir pabba sínum einn daginn þegar hann kom heim.
Pabbi pabbi... ég seldi hundinn!!!!!!!!!!!
Pabbinn var náttúrulega ekki ánægður með það og byrjaði að skamma strákinn.
Strákurinn svaraði hins vegar fyrir sig og sagði: "Þetta var bara ómerkileg tík og ég fékk 10 milljónir íslenskra króna fyrir hana"
Pabbinn varð himinlifandi en strákurinn hélt áfram: .................."Já og ég er meira að segja búinn að fá borgað..... ég fékk tvo kettlinga á fimm milljónir hvorn"

Það er hins vegar ekki góður díll..........

Pappírspeningar útum allt. og svo erum við að væla yfir lélegri krónu!
Held að það sé tímabært að við tökum höfuðið úr rassgatinu.

góðar stundir
Langi Sleði

...tvisvar verður sá feginn er á steininn sest

2008-07-15T19:27:00.003Z

...líklega hefur hvíldin farið illa með Langa Sleða. Nöldrið og sjálfsvorkunnin hefur samt sem áður nagað hann innvortis og ástandið er orðið þannig að lifrin er búin, magasárið blæðir einhverra hluta enn og nú gnístir í beinunum þannig að honum er orðið erfitt um svefn vegna hávaða.
Þá er nú betra að hafa þetta útvortis eins og vörturnar.
Það er ekki eins og það hafi ekki verið til bensín á tankinum. Eins og sú óumræðanlega fyndna frétt sem fæddist er formaður samtaka ofvirkra bætti við sig nýju starfi formannsstarfi samtaka þvaglekasjúklinga. Nú er allt í einu sprottin upp barátta við að koma upp kömrum út um alla borg...nema kannski að menn ætli að fara með auglýsingaherferðina "skítt með kerfið"... mun lengra.
Viss um að Jónína Ben stendur svo á bakvið þetta allt saman.
Veit ekki hvernig eða hvað Langi Sleði tekur sér fyrir hendur hér á síðunni, en við skulum sjá hvort stefnulaust blaður og ósjálfvirkur en oft tilviljanakenndur ásláttur, framkalli ekki eitthvað skemmtilegt.

Góðar stundir
Langi Sleði

...blogg

2008-07-09T09:54:00.002Z

...ég ætla að byrja að blogga aftur.

Góðar stundir
Langi Sleði

...keppni

2008-02-02T18:49:00.000Z

...handboltinn var ömurð.
Síðan þá hefur Langi Sleði unnið ötullega í að finna íþrótt sem við Íslendingar gætum verið góðir í.
...og hún er fundin.
Þar sem Langi Sleði hefur óhjákvæmilega þurft að keyra Kringlumýrarbraut oftar en góðu hófi gegnir undanfarið, hefur hann þurft að fylgjast með bændum og öðru dreifbýlisfólki skemmta sér í samhliða akstri.
Fólkið keyrir úr og í borgina oft á dag, líklega til að gefa á garðann eða jafnvel til að mjólka kýrnar. Það er því ekki að furða að bændur og búalið sé í góðri þjálfun.
Þetta væri deild sem KB banki ætti að styrkja.
Þetta gæti meira að segja tryggt þeim stöðugleika.
...Íslendingar bestir í heimi í samhliða akstri.

góðar stundir
Langi Sleði

...smáatriði

2008-01-14T09:46:00.000Z

...Kellogs Special K kúrinn var ekki að gera neitt fyrir Langa-Sleða. Það var ekki fyrr en hann fór að borða Special K á sundbolnum einum fata að hann byrjaði að grennast.

Góðar stundir
Langi Sleði

...fríþankar

2007-12-16T06:20:00.000Z

...ég skil ekki af hverju það eru svona ótrúlega margar vélhjólaleigur hér á Indlandi. Umferðarmenningin er nefnilega þess eðlis að maður þyrfti að vera verulega þjakaður af sjálfsmorðshvöt, til að detta það í hug að prumpa um á skellinöðru á þessum vegum. Virðingastiginn á vegum úti ætti nú samt ekki að vefjast fyrir neinum. Efst tróna kýrnar, skreyttar eður ei. Næst koma stærstu faratækin, vörubílar og rútur sem líta yfirleitt út eins og skreyttir ruslahaugar. Þar fyrir neðan koma svo lúxusbílarnir, sem eru án undantekninga með ógegnsæjum rúðum... og fara hratt. Þvínæst koma venjulegu bílarnir, bílarnir sem okkur finnast svo mjóir á Íslandi að það er nær ómögulegt að koma 4 dekkjum undir þá... Indverjar leystu það snilldarlega og minnkuðu bara dekkin líka. Þau eru svipuð að stærð og hjólbörudekk..... eða minnsta pizzan hjá dominos.
Þar fyrir neðan koma svo mótorhjólin, mörg hver varin með stálstöngum að framan, því ekki ef heldur þegar klesst er á þá fara fæturnir ekki endilega alveg í hakk. Útúrdópaðir hippar, bruna á vit forfeðra sinna, daglega hér í Goa. Neðst eru þó skellinöðrurnar, sem fólk leigir án nokkurra skilmála. Eins og sagt er... það er roadkill waiting to happen. Það setti reyndar svip sinn á brúðkaupið í gær að gestir sem voru búnir að drekka allan daginn ákváðu að þau væru í standi til að skellinaðrast heim á hótel, þar sem þau væru of drukkin til að ganga. Það endaði hins vegar illa og þau enduðu ferðina á vegg og eru á sjúkrahúsi þessa stundina. Veit að systur mínar hugsa... "þeim var nær!"...og það geri ég líka.
Fleiri ferðasögur má lesa hér

Góðar stundir
Langi Sleði

...ritlar titlar og kýr

2007-12-12T15:11:00.000Z

....Langi Sleði er búinn ad sjá það ad það þarf ekki mikið skáld til að skrifa stórkostlegan texta hér á Indlandi. Það þarf einungis ad geta lýst þvi sem fyrir augu ber.
Túristarnir taka myndir af fyrstu beljunni á ströndinni og fyrsta fíladansinum.
Það þarf aðeins að passa ad lenda ekki í hlaupalínu belju er hún tekur á sprett. Fólkið hér er af tvennum toga, annars vegar innfæddir og hinsvegar hinir sem gleymdu ad fara til baka... árið 1970. Þetta er hippanýlenda dauðans. Hér er allt ódýrt. Keypti t.d. ekta Guzzi sólgleraugu á spottpris, only for me myfriend.
...
Góðar stundir
Langi Sleði

...pisshissa

2007-11-28T22:36:00.000Z

...var orð sem Langi Sleði notaði stundum sem barn.
Reyndar hefur hann lengi ætlað að blogga og stundum staðið í þeirri meiningu að hann hafi í raun og veru bloggað... en því hefur ekki verið að heilsa... og því pisshissi heilsað.

Langi Sleði varð einnig pisshissa þegar hann kom heim með bókina "Dauði trúðsins" eftir Árna Þórarinsson... byrjaði að lesa bókina og komst að raun um að þetta var ekki ævisagan hans Guðna ráðherra. Þetta fór í flokk með topp tíu vörusvikum ársins.

Góðar stundir
Langi Sleði

...trobbúl

2007-10-30T19:11:00.000Z

...Langi Sleði var að horfa á fréttir stöðvar 2. Það er svosum ekki fréttnæmt. Hins vegar stakk það hann eilítið þegar kynnt var "förðunarnámskeið fyrir konur sem eru að jafna sig eftir krabbameinsmeðferð". Það stakk einungis fyrir þær sakir að "fréttamennirnir" spiluðu lagið "trouble" með Coldplay undir fréttinni. Hér er linkur á textann... og ég held að við getum sammælst um að kalla lagavalið.... óheppilegt... og jafnvel eðlilegt að fréttamaðurinn upplifi sjálfur smá trobbúl uppúr þessu.

Góðar stundir
Langi Sleði

...blendin ánægja

2007-06-01T09:20:00.000Z

...ekki misskilja mig!
Það er mjög ánægjulegt þegar við fáum hlýtt loft frá Evrópu.
Hins vegar er blendni hlutinn vegna þess að hlýja loftið fer yfir með hraðanum 20 m/s.

Góðar stundir
Langi Sleði

...ach ja herr Kommissar!

2007-05-22T00:03:00.000Z

...hái hommalegi þjóðverjinn sem er á steypunámskeiðinu sagði við mig áðan háum skrækum Hitlersrómi: I'm ze pipeline, JA!"
ég:WHAT?
hhþj (hinting at the coffees he was carrying on a tray): yezz, I zzell my zzövizzezzz, JA!
ég: that's disgusting!
and away he walked gaily tilting his hips from left to wrong.

Góðar stundir
Langi Sleði

...svo hraustur

2007-05-21T23:38:00.000Z

...þá sjaldan er Langi Sleði fer í apótek, þá er ástandið venjulega þannig að starfsfólkið hringir á sjúkrabíl í stað þess að afgreiða hann um eina panódíl.
Í dag hinsvegar fór ég í apótekið í kremaleiðangur. Ég sá fljótt að ég var óeðlilega hraustur miðað við fólkið í kringum mig. Baugóttir, bognir og brotnir einstaklingar. Sárir, sviðnir og snýtnir einstaklingar.
...og svo alltaf þessi eini sem kaupir plástra í stykkjatali og vomir í nágrenni smokkarekkans.

Góðar stundir
Langi Sleði

...upprisa

2007-05-17T16:50:00.000Z

...það er viðeigandi að endurvekja bloggskrifin á uppstigningadegi.
Langi Sleði fór í bakarí í morgun á milli vonar og ótta að það væri opið.
Þegar ég kom að, var gamall maður að telja aura fyrir brauði. Langt síðan ég hef séð aura, hugsaði ég! Afgreiðslumaðurinn, innflytjandi, hefur örugglega aldrei séð aura, a.m.k. ef lesið var úr undrunarsvipnum sem fyllti bakaríið.
Svo kom það reyndar í ljós að hann átti ekki fyrir brauðinu í klinki og gremjan sem af því leiddi bitnaði eingöngu á afgreiðslumanninum. Hann var svo upptekinn við að gremjast þegar hann var að tína upp klinkið að dágóður slatti endaði á gólfinu.
"Helvítis útlendingar", þusaði hann um leið og hann beygði sig niður eftir klinkinu og það var þá sem ég steig ofan á eina fimmtíukallinn á gólfinu.
Á endanum greiddi hann með 500 króna seðli og margtaldi afganginn. Að síðustu heimtaði hann kassakvittunina og sagði "á að snuða mann um kvittunina líka?". Það vill svo til að ég fer oft í þetta afbragðsbakarí og vissi því að afgreiðslumaðurinn vissi ekkert hvað þessi karlugla var að væla. Hann er nefnilega nýbúinn að læra að segja tölurnar á íslensku. Allavegana karluglan gleymdi brauðinu og ég var ekkert að minna hann á það.
Eftir að hann var farinn út, og ég búinn að sparka fimmtíukallinum í uppsópið hinum megin við búðarborðið, var ég sérlega kurteis og skemmtilegur og um leið og við vorum búnir að ákveða allt mitt bakkelsi kom karlbeljan inn aftur og mælti: "ÞETTA er nú meira þjófabælið!" Að því búnu flassaði hann okkur, með vininn beinstífan, snérist á hæli og strunsaði út!
Ég var í sjálfu sér ekki búinn að fá málið, aftur en um leið og karlinn gekk út um hurðina sagði útlendingurinn: "Takk fyrir komuna!"
Ég missti nánast þvag!

Góðar stundir
Langi Sleði

...eftir

2007-04-12T10:22:00.000Z

...langa íhugun hefur Langi Sleði ákveðið að það er ekki lengur kúl að tjá sig um þjóðmálin á gagnrýnan hátt. Síðan alls kyns fábjánar fóru að tjá sig á íhugunarviðhengjum fjölmiðla, sem eru misvel ígrunduð (og sum ættu reyndar að kallast amk ógrunduð) hefur það komið í ljós (mér að óvörum) að öllum virðist vera hleypt á internetið. Það sem stingur ennfremur augun úr kúnni, er að allir virðast þurfa að tjá sig og vanskilningur almennings um eigið ágæti virðist hafa endurfæðst í nýrri vídd.
Ég hef því ákveðið að bloggið í þessari mynd sé dautt.

Það verður því stefnubreyting hér.
Frumleiki og frygð!

...kannski ekki frygð... það hljómaði bara svo vel með!

Góðar stundir
Langi Sleði

...tóm til tjáningar

2007-04-03T00:43:00.000Z

...undanfarið hefur Langi Sleði látið þjóðfélagið fara í taugarnar sínar. Langi Sleði hefur legið undir feldi varðandi það.
Hversu heimskulegt er í rauninni að hafa allt á hornum sér í einhverju sem maður er partur af.
Það er eins og að vera hvítur og uppfullur af heift í garð hvíta kynstofnsins!
Jafn gáfulegt og að fara til Írak á heitasta tímanum og kvarta yfir hita.
Ég er á lífi og ég hef það gott! Mun reyna að breyta þeim ósið mínum að láta mínar skoðanir bitna á ykkur og ætla að einbeita mér frekar að ykkar góðu stundum.

Góðar stundir
Langi Sleði

...egill helga

2007-03-11T13:08:00.000Z

...svaraði spurningu minni varðandi mjólkur/landbúnaðarniðurgreiðsluna sem var falin í verðsamanburði ríkissjónvarpssins. Það kom í ljós að landbúnaðurinn er niðurgreiddur um einhverja 14 milljarða, sem samsvarar 20 þús kr á mánuði á 4 manna fjölskyldu.
Sem er gott og algerlega í takt við þá ósk okkar að við séum örugglega með dýrasta landbúnað í heimi. Ég held að það sé jafnvel betri tilfinning að vita það... en að vinna í eurovision!!
Menn veltu því einnig fyrir sér hví vinstri grænir hefðu svona mikið brautargengi.
Mér sýnist það nú vera frekar augljóst þar sem þeir, ásamt sjálfstæðisflokknum, eru eini flokkurinn sem reynir að eiga einhverja stefnu.
Samfylkingin er löngu hætt að þykjast hafa einhverja stefnu, enda hefur það ekkert gengið upp þar sem þeirra stefna er einungis sú að vera ósammála sjálfstæðisflokknum.
Einnig er ekki hægt að taka mikið mark á tilviljanakenndum handaveifingum framsóknarflokksins, sem á eftir að slá heimsmet og fá neikvætt fylgi í næstu kosningum og ég sé Valgerði fyrir mér í þegnskylduvinnu við að skúra gólf.
Frjálslyndir... eru í besta falli flokkur með ljótt merki.

Góðar stundir
Langi Sleði

...trúi þessu ekki

2007-03-06T19:32:00.000Z

...á ríkissjónvarpið!
Fyrst stálu þeir verðkönnun fréttamanna erlendis, sem 365 gerðu fyrir viku síðan... og svo tóku þeir sérstaklega fram í heimsku sinni að mjólkin væri ódýrari hér en í Dk og BNA. Þeir eru líklega búnir að gleyma því að mjólkin er niðurgreidd og þú borgar fyrir mjólkina í sköttunum þínum. Væri fróðlegt að vita hvað mjólkin er mikið niðurgreidd! Til að vita raunverð á lítra, þar liggur fréttin!

til hamingju með það

Góðar stundir
Langi Sleði

...millísekúnda

2007-03-03T16:05:00.000Z

...í lífi Langa Sleða á djamminu.
Þetta hófst allt saman kl: 02:49:58:048
Maður sem ég þekki horfði á grimmilega á mig og skvetti bjórnum svo yfir mig. Langi Sleði tók Matrix move en fékk hluta af gusunni á sig.
Sá fyrir mér högg undir bringuspalirnar með vinstri hendi og kjálkahögg með hægri hendi.
Ákvað að sleppa því, þar sem þetta var hans frústrasjón þar sem konan sem hann var að reyna við, var að reyna við mig.
Árangurslaust, tek ég fram... Þessu lauk kl: 02:49:58:049 og ég vandaði mig.
Gekk annars heim í ísrigningu, það var ákveðinn hápunktur!

Góðar stundir
Langi Sleði

...það semsagt borgar sig

2007-03-03T15:57:00.000Z

... að nota kredit.
Og sem viðbót. Þá er hægt að spyrja hvort það sé staðgreiðsluafsláttur, ef svo er, þá getið þið samt borgað með kredit og hirt staðgreiðsluafsláttinn. Því mér skilst að það sé ólöglegt að mismuna gjaldtöku á þennan hátt.

Góðar stundir
Langi Sleði

...skapi næst að skipta um banka!

2007-03-02T00:15:00.000Z

...og þá er ég ekki að fara í Sparisjóðina. Þar sem sjónvarpsauglýsingarnar þeirra þessa dagana sýna fólk sem er að segja hvoru öðru upp. Tvíræðnin er ... eru þau gift? er slúður? hvað gerist? ... fávitar!

Glitnir er hins vegar alveg að kúka upp á bak í fáránleika og óheiðarleika auglýsinga!
Bíðiði aðeins ég ætla að ná í bæklinginn sem ég fékk sendan í dag.
Eigðu afganginn!
Eins einfalt og að brosa!... Það er þá fjandans Sólheimaglottið!
Sko
Fyrst skulum við kíkja á dæmi þeirra um sparnað.
Tökum til dæmis að hækka allar færslur upp í næsta 1000 kall.
Kauptu þér epli á 100 kr og 900 kall er tekinn út af debetkortinu þínu og það er kallaður sparnaður.
Þú sparar og finnur ekki fyrir því!!... Epli á 1000 kall drepur alveg niður þessa 6% matvörulækkun held ég.
Nóg um það... Við skulum horfa framhjá þessu. Þessir menn, hafa ekki einu sinni nennt því að taka meðaltal debetkortafærslna hjá almenningi, heldur segja þeir bara að meðalfærslan sé eitthvaðþúsund og fimm hundruð... Þegar það blasir við að kaupmenn láta megnið af sínum vörum enda á 999, x99 eða x9 og það nálgast ekki 500 í meðaltal.
Allavegana látum það hjá líða.
Sparnaður á einu ári er þá 500x360=182.000 kr á ári miðað við eina færslu á dag.
En bíddu... hvað er eiginlega að þeim?
Hvað gengur þeim til?
Hvaða fáránlega rugl er þetta?
Hvað er ekki sagt?
Jú. kíkjum aðeins á nokkur atriði, aukaatriði.
Við skulum þá fara að nota debetkort!
Debetkortafærsla kostar 13 kr
Það þýðir að bankinn er strax búinn að hirða 13x360=4680 af þessum sparnaði þínum. Einnig skal taka það fram að ef þú ferð framyfir á reikningnum þá borgarðu
0-5000 kostar 750 kr fyrir
5000-10000 1410 kr, 10000-50000 2450 kr og svo framvegis
Þannig að það er eins gott að þú hafir efni á þessu... Ég meina... hvað haldiði að margir Íslendingar lifi á yfirdrættinum?
Þvínæst skulum við kíkja á samanburðinn við kreditkort.
Hver færsla kostar ekki neitt, þú getur beðið í mánuð með að borga og því gildir skv. lögmálum Glitnis (segjum að meðaltalseyðsla á mánuði sé 150 þús) til að einfalda dæmið skulum við setja upphæðina á vexti í 15 daga. 150 þús*6%/12 mán/30dögum*15 dagar= 375 kr á mán. M.v að þetta væri á venjulegri bók og þú sért með 6% vexti á ári... 375 kr á mán*12 = 4500
ok. Sparnaðurinn kostar þig semsagt að lágmarki 4.7+4,5 = 9,2 þús, sem fer beint í bankakassann. En.... þar sem bankinn getur notað þennan pening og lánað okkur hann með 20% vöxtum skulum við bæta við 2 þús kalli á þetta... í viðbót
Sem er æðislega góður díll ef þú ert fábjáni!
Held að Glitnir væri stimplaður geðbilaður ef að þeir myndu segja satt og rétt frá:
Sparaðu okkur vaxtagreiðslur og borgaðu meira í þjónustugjöld... og við munum græða 12 þús fyrir eigendurnar okkar.. Svo við getum látið Bjarna fá ca 300 milljónir í viðbót við venjuleg laun.
....
og mundu að brosa
því við erum hér fyrir þig.

Góðar stundir
Langi Sleði

...drama

2007-02-19T19:31:00.000Z

...allt í einu eru allir að tala um nagga!
Ég geri ráð fyrir því að það sé rökrétt framhald á þeim dramaumræðum sem hafa átt sér stað í fjölmiðlum undanfarið.
Byrgið, Breiðavík, naggar, klámráðstefna!
Einhvern veginn hélt ég að það væru bara fyllibyttur og öryrkjar sem borðuðu nagga. Ekki að þar fælist vandamálið á bak við feit börn.

Góðar stundir
Langi Sleði

...undanfarið

2007-02-18T21:49:00.000Z

...hefur fólk horft á mig undarlegum augum.
Líklega hefur það kannski alltaf loðað við mig að fólk hafi horft á mig undarlegum augum en það er eins og þau hafi ekki alveg fengið staðfestingu á hvað það væri nákvæmlega sem pirraði sjónrænu skynjunina.
Undanfarna daga hefur sá pirringur nú horfið þar sem undarlegu augngoturnar hafa nú öðlast brennipunkt.
...
Þetta hófst allt fyrir nokkrum vikum á mjög undarlegu atviki.
Ég er í nornabúð ónefndri sem ég leitaði skjóls í vegna snjóbyls. Auk mín og afgreiðslumannsins, sem er augljóslega rammgöldróttur, er ein stúlka í búðinni, líklega í einhverju kuldasjokki en hún er niðursokkin í sínum heimi og hummar í sífellu. Afgreiðslumaðurinn er greinilega búinn að galdra sér haukfrá augu, því uppúr þurru sagði hann að ég ætti að skila skyrtunni sem ég klæddist því önnur önnur ermin væri gölluð og myndi klæða mig illa í framtíðinni. Ég hélt fyrst að hann væri með hótfyndni og hann væri að segja mér að hann sæi í raun hvaða erindagjörðum ég væri þarna.
Á þessum tímapunkti er stúlkan einhvernvegin búin að króa mig af í búðinni og stendur nú aðeins og starir.
Ég fékk það á tilfinninguna að ég væri að trufla elskendamál og ákvað að láta mig hverfa. Ég ætlaði alls ekki og endilega að lenda á trúnó með einhverju pari sem ég þekkti ekki neitt, sérstaklega, þar sem ég er farinn að það túlka sem misnotkun á mínum hæfileikum.
Ég tek því strikið að hurðinni og í því hrópar stúlkan uppfyrir sig að hún hafi týnt öðrum hanskanum sínum. Ég svipast um eftir honum í snarheitum, enda hjálplegur með afbrigðum. Þegar ég sé hann ekki, vippa ég mér út í bylinn sem hjálpar mér að hverfa eins og dögg fyrir sólu. Axlarkláðinn ágerist með hverri mínútunni. Þegar ég er búinn að ganga í 10-15 mínútur þegar ég set hendurnar í buxnavasana til að reyna að hemja klórverkið.
Forviða dreg ég upp kvenmannsleðurhanska!
Ég sneri strax við því þarna sá ég að leðurhanski stúlkunnar hlyti að vera kominn. Ég var rétt hálfnaður á bakaleiðinni þegar ég mætti stúlkunni.

Ég átti ekki orð.

Hún var einhent og mér var brugðið.

Ég mannaði mig nú samt upp í það að spyrja, hvort þetta væri ekki örugglega hennar hanski. Hún játti því, horfði á mig undarlegum augum og svaraði: "en hefur þú ekki meira við hanskann að gera með þessa beru kvenmannshendi útúr öxlinni".
...
Eftir dálitla stund játti ég því!

Góðar stundir
Langi Sleði

...Breiðavík, mbl.is og visir.is

2007-02-08T21:46:00.000Z

...jájá, ég er alveg sáttur við fallbeyginguna og af hverju ætti ég ekki að vera það! Held samt að svona örnefni séu slæm, þó að ég sé nú kannski ekki að mæla með að víkin verði kölluð Krísuvík.
Hins vegar legg ég þann skilning í landakortalistina okkar (sjá hér) að nafnið Ómagavík eigi prýðilega við.
Hugsanlega er ég jafnvel skyggn.

Yfir í allt annað!
Ég er ekki kominn yfir þann kjánahroll sem þjakar mig þegar ég les fréttamiðlana mbl.is eða visir.is.
Þegar ALLIR, þar með taldir óáhugaverðir, nöldrarar, málhaltir og vitlausir, ignorant, bastarðar, o.s.frv.
Auk þess hefur þetta ýtt bloggurum víðsvegar um internetið til að flykkjast inn á þjónustu blaðanna, svo þeir fái fleiri heimsóknir. Ú... æði! Svona lagað stuðar mig!

Ég mæli STERKLEGA með því við ritstjórn þessara blaða að þessi þjónusta þeirra verði sett inn í adblockable items í mozilla firefox.

Góðar stundir
Langi Sleði

...þjáning

2007-02-07T00:31:00.000Z

...ég viðurkenni það ógjarnan en ég þjáist fyrir blaðamenn sem kunna ekki að fallbeygja.
Kannski er það í raun sem þjáir mig að ég veit ekki muninn á réttu og röngu varðandi orðið (nf. Breiðavík).
Veit vel að hugsanlega er hjákátlegt að tala um fallbeygingaþjáningu mína á þessu orði.
En er ekki einhver sem getur sent fjöldapóst á blaðamannastéttina og hreinlega ákveðið hvernig orðið skuli fallbeygja.
Ég hallast að Breiðavík/Breiðuvík/Breiðuvík/Breiðuvíkur
þar sem ábúendur tala yfirleitt um Breiðuvík, skil samt að í sjálfu sér séu einnig rök fyrir því að fallbeygja þetta Breiðavík/Breiðavík/Breiðavík/Breiðavíkur (sbr. Reykjavík)
En plís og dísus kræst reyniði að ákveða ykkur hvort þið ætlið að gera.
Þó að ég glotti nú að því þegar sjónvarpsfólkið stamar á orðinu

Góðar stundir
Langi Sleði

...veit ég það vel

2007-02-06T00:17:00.000Z

...að ég hef rætt þetta áður. En enn á ný angrar utanviðsig-genið mig er ég kaupi sjampó og gríp í stað þess hárnæringu.

Ég geri mér fulla grein fyrir því að það hljómi jafn fáránlega í eyrum og að velja eyrnapinna í stað túrtappa.
En það eru ekki mín eyru!

Hvernig svo sem á það er litið!

Góðar stundir
Langi Sleði

...þorrinn

2007-01-31T22:19:00.000Z

...er tekinn hátíðlega á þessu heimili.
Kannski er ekki rétt að tala um hátíð í þessum skilningi, þetta er meira svona áskapað ástand.
Ostarnir sem ég fékk í öllum jólakörfunum var hrúgað inn í ísskáp og mynduðu einhvern veginn ógurlegt dóminó fjall. Eftir því sem á mánuðinn hefur liðið, hefur fjallinu svo vaxið ásmegin og búast má við yfirliði bráðlega. Hvort sem heldur er litið til innbús ísskápssins eða eigandans.
Hins vegar minnir þetta mig alltaf á gamlan vinnufélaga, sem var alinn upp í torfbæ. Súrmeti var daglegur matur vinstri hægri vegna þess að rafmagn var ekki nálægt bænum... og allur matur var bara í þessari gömlu geymsluaðferð.
Eitt sinn í hádegismat, fann hann í ísskápnum gamla skyrdós sem enginn hafði borðað og nú var hún komin mánuð yfir síðasta söludag. Hann hinsvegar opnaði dósina, setti vel í skeið og fékkk góða munnfylli. Gretti sig þvínæst ógurlega og sagði: "Ahhhnndskoti er þetta súrt....". Svo kláraði hann dósina, með miklum stunum og tilfæringum.
Yfir andlit mitt færist því minningarglott þegar ég opna ísskápinn.
Það er gott og óska ég ykkur hins sama.

Góðar stundir
Langi Sleði

...símtal

2007-01-26T21:00:00.000Z

...kl 09.58 heyrði ég símann minn hringja... ég hljóp inn á skrifstofu, rétt tímanlega til að hlusta á síðustu hringinguna kveðja.
Ég þoli ekki þegar það gerist.
Ég kíkti á númerið 421xxxx, og hugsaði: hmm hvaða númer er þetta?
Ég hringdi og það var á tali.
Tveimur mínútum síðar hringdi ég aftur og þá svaraði einhver morgunfúll kall.

Hann: Halló!?!
Langi Sleði: Já góðan dag, það var verið að hringja í mig úr þessu númeri.
Hann: NÚ, ég hef ekkert verið að hringja í allan morgun.
Langi Sleði: Hvað meinarðu, það var ein mínúta síðan þú hringdir.
Hann: Ég er andskotann ekkert búinn að hringja þarna!
Langi Sleði: Ég er ekkert að búa þetta til!
Hann: Eina símtalið sem ég hef hringt í morgun er að ég var að leita að gemsanum mínum... ég finn hann ekki! ... Hvað er símanúmerið þitt?
Langi Sleði: 861 xxxx
Hann: Það er mitt númer!
Langi Sleði: Nei þetta er mitt númer!
Langi Sleði: Ég er búinn að hafa þetta símanúmer frá örófi. Þetta er mitt númer
Hann: Hvað sagðirðu?
Langi Sleði: 861 xxxx
Hann: Þetta er mitt númer! Hvað ert þú að gera með símann minn?
Langi Sleði: Hvað er eiginlega að þér?
Hann: Er ég að rugla (orðinn reiður)? Hvað í andskotanum ert þú að gera með símann minn?
Langi Sleði: Heyrðu vinur, sestu bara niður og hugsaðu allt lífið þitt upp á nýtt því þú ert ekki sá sem þú heldur þig vera!
Hann: Ha?
Langi Sleði: Siturðu?
Hann: Nei!
Langi Sleði: Sestu!
Hann: Afhverju?
Langi Sleði: Svo þú fáir símann þinn aftur!
Langi Sleði: Hvað heitirðu?
Hann: Jón Jónsson, góðugötu 3
Langi Sleði (fór á ja.is): símanúmerið þitt er 831 xxxx ekki 861 xxxx
Hann: Jaaaaááá
Hann: Afsakaðu ónæðið

Góðar stundir
Langi Sleði

...Ísland er svo lítið land

2007-01-25T22:50:00.000Z

... að maður kemst ekki hjá því að hrufla olnbogana með reglulegu millibili.

Stundum hittir maður fólk sem á einn eða annan hátt hefur markað líf manns sporum sem aldrei gleymast, en kemur til með að fenna í með tímanum.
Fjöldi vetra, fjöldi verta.
Þetta gerðist í kvöld. Í stuttu spjalli komst ég að raun um það að stúlkan var farin að vinna með fólki sem ég þekki úr þremur mismunandi áttum.

Hrjúf hné,
hrúfir olnbogar.
Deyr sjálfur hið sama!

Góðar stundir
Langi Sleði

...fimmtudagskvöld

2007-01-23T23:09:00.000Z

...það vita það fáir en fimmtudagskvöldum eyðir Langi Sleði á elliheimilinu Grund. Yfirleitt hitti ég þar fólk sem á enga að, ættingja sem nenna ekki að umgangast fólkið sitt.
Það er fólk þarna sem fær ekki heimsóknir í fleiri mánuði. Það er hreint og beint illt að gera manneskjum það.
Allavegana, ég hitti alls konar skemmtilegt fólk... og náttúrulega leiðinlegt fólk líka. Nú á síðasta fimmtudag lenti ég í ...jahh... sögulegri reynslu, þess vegna eruð þið að lesa hana hér.
Ég var í setkróknum á annarri hæðinni en þar er meiri umönnun en á fyrstu hæðinni. Fólk er almennt farið að gleyma en það er mjög misjafnt hvernig gleymskan leggst í þau.
Allavegana.
Þarna er ein kona sem ber af, bæði varðandi líkamlegt og andlegt atgervi. Alltaf hress og skemmtileg og hefur ofsalega gaman af því að segja frá því hvað hún var mikil skvísa í gamla daga.
Laufey.
Það eru hópumræður um fábjánana sem eru að stofna ellingjaflokkinn. Fólk sem á það sameiginlegt að vera nöldrarar og hafa ekki fengið nóg, þó að allir séu nú sammála um mikilvægi flokksins.
Laufey liggur á gólfinu á dýnu og er að hjóla í loftinu um leið og hún horfir á "The bold and the beautyful", skyndilega heyri ég læti fyrir aftan mig og það sjúkraliðar að hlaupa í áttina til okkar með sjúkling í rúmi.
Nú kemur röð ótrúlegra atburða.
Ég snýst á hæli en um leið rekst sjúkraliðinn í mig. Við það valt ég yfir stólaröðina og gróf andlitið í túperuðu hárinu hennar Laufeyjar. Það er ekkert jafn ógeðslegt og sveitt túperað hár, næstum því alveg hart og svo þessi agalega klístraða lykt sem festist inní nefinu á mér. Sem betur fer meiddist enginn. En Laufey hló og hló. Hún sagði að ég væri yngsti karlmaðurinn til að reyna við hana í 30 ár (hún er 82) og að svona hugrekki bæri að verðlauna. Eftir að ég hafði gengið úr skugga um að hún væri örugglega ekkert slösuð, reisti ég hana við. Hún greip utanum um höfuðið á mér og ég hélt að hún ætlaði að kyssa mig á kinnina. Hún kyssti mig hinsvegar beint á munninn og smellti svo andlitinu mínu ofaní brjóstaskoruna... Sem er enn töluverð.
Langi Sleði var forviða og forundraður og það eina sem mér datt í hug var slagorð Vodafone sem stendur á hlaupabrettinu í World Class: "Gríptu augnablikið og lifðu núna!"
Ég vona að ég verði svona skemmtilegt gamalmenni!

Góðar stundir
Langi Sleði

...auglýsingar

2007-01-21T23:35:00.000Z

...í Kompásþættinum hans Gústa barnanetsperra voru náttúrulega seldar auglýsingar af mikilli grimmd. Hefði ekki mátt ritskoða þær aðeins?
Eftirfarandi auglýsingar voru inní þættinum:
1. Sprengivika hjá ónefndu fyrirtæki hér í bæ!
2. Náðu fram því besta í fólkinu í kringum þig, Dale Carnegie!
3. Við finnum rétta starfsmanninn fyrir þig (ráðningaþjónusta)!
4. Tölvuskóli auglýsti fjölbreytt námsframboð
5. Er fundur framundan? Hafðu samband og við aðstoðum þig við undirbúninginn! Svona auglýsti hótel

Kannski á ég bara að fara að sofa.
Góðar stundir
Langi Sleði

...margt smátt gerir eitt stórt

2007-01-21T21:55:00.000Z

...ég get ekki orða bundist yfir því atburðum undanfarinna daga... svo illa að ég veit eiginlega ekki hvar ég á að byrja.
Byrjum á Kompási.
Sigmundur Ernir opnaði á því að tilkynna það að ætlun Kompáss í þessum nýjasta þætti væri að: Komast að því hvernig væri fylgst með barnaníðingum. Persónulega fannst mér megnið af þættinum fara í smjatt á málum Ágústs Magnússonar. Sá maður er greinilega snargeðveikur og á alls ekki að koma nálægt samfélaginu. En bíðum aðeins hæg! Hann er með internetaðgang í vernduðu umhverfi og það þarf nú engan snilling til að átta sig á því að það þarf að passa upp á þennan mann! Er það nokkuð?
Mér sýndist einna helst á þættinum að það væri engin stofnun tilbúin til að taka þetta að sér og mjög takmarkaður áhugi fyrir þessu. Verður fólk ekki reitt lengur? Má ekki öskra í sjónvarpinu? Hvar var Ásta Möller?
Jú hún var í Silfri Egils!
Hef líklega bráðaofnæmi fyrir henni því í hvert sinn sem hún opnar munninn þá fæ ég kjánahroll. Ignorant frá upphafi. Hún náði að væla yfir því, að Ólafur væri að eyða peningum í Elton, hún tók það reyndar fram að það væri virðingarvert að stofna þennan milljarðasjóð, en sagði samt sem áður... "af hverju bara ekki að henda þessum téðu 70 milljónum í viðbót í pottinn". Langi Sleði setur þetta allt í samhengi við atburði síðastliðinna daga og sér strax að það er tvennt í gangi. Annars vegar, þá eru hjónin að losa sig við Sambandspeninga sem þau hafa nákvæmlega ekkert not fyrir og gera ekkert nema að íþyngja þeim andlega, leyfi ég mér að trúa...eða vona. Hins vegar er augljóst að hann er "flaming gay"... eins og hárgreiðslumaðurinn minn sagði um annan stórversír í viðskiptalífinu.
Til þess að fullkomna helgina sá ég svo hluta af myndbandinu sem kennt er við Gumma í Byrginu, heimavídeó uppá nær 400 Mb. Ekki endilega af því að mig hafi langað að sjá hann, en frekar vegna þess að mig langaði að sjá hann undir áhrifum smjörsýru.!. Greyið!
...Ég hef nú mjög takmarkaða meðaumkun með þessum manni en vorkenni fólkinu hans og öllum þeim sem urðu fyrir barðinu á honum....og nei... ég get ekki hugsað mér að gera grín að því að hann noti barðastóran hatt.

Þessi maður hér gefur orðinu fífl nýja vídd. Þetta gleður Langa Sleða með eindæmum, einkum vegna þess að hann er svo óskaplega vitlaus að honum er ekki við bjargandi.
Maður verður að geta brosað eftir svona pistil.

Góðar stundir
Langi Sleði

...kominn tími til

2007-01-18T21:10:00.000Z

...að Langi Sleði færi að hlæja að sjálfum sér.
Fór urrandi grimmur í ræktina, eftir streð dagsins. Alls konar leiðindi innifalin í bransanum. Var að vísu eitthvað búinn að vera slappur svo að ég gerði ráð fyrir því að það yrði döpur frammistaða.
Ég stillti hlaupabrettið eins og venjulega, hraðann á 12, tímann á 15 og lagði af stað. Eftir tvær mínútur, var ég alveg búinn og þá meina ég ALVEG. Hoppaði af brettinu og fór að velja mér legsteina í huganum. Datt engin skemmtileg grafskrift í hug svo ég leit aðeins betur á brettið. Það hafði einhver húmoristi breytt km/klst í mílur/klst. Þannig að Langi Sleði var að hlaupa 12 MÍLUR/klst eða 19,3 km/klst. Ég stillti korterið á 8 mílur/klst (12,9 km/klst) og kláraði það.

Kosturinn við að vera í Laugum á háannatíma er náttúrulega sá að maður hittir ógrynni af fólki.
Án þess að nöfn séu uppljóstruð, voru þarna fögur fljóð og fínir þankar.
Þetta bjargaði alveg deginum !

Góðar stundir
Langi Sleði

...krafs í kúkabeði

2007-01-17T23:14:00.000Z

...í þessari súru tíð!
Sá snefill af mannlegri gæsku, sem ekki hafði frosið fastur við skítlegt eðli forsjónarinnar. Gerði það í dag... og í gær, og í fyrsta skipti horfði ég á fréttir gjörsamlega áhugalaus um innihald, þeirra ræpurunnaveiða sem þar fara fram. Hún klórar mér, ég klóra henni og saman kúkum við á hann!
Fréttamennirnir sjálfir eru fyrir löngu orðnir eins og ljóshærðu pæjurnar með stóru brjóstin sem trúa "ÖLLU". Jafnvel að einkaflugvél Jóhannesar í Bónus hafi brotlent á Miklubraut á háannatíma, eftir hefndaraðgerð flugumferðarstjóra sem var afgreiddur um skemmt epli frá jonagold.
Það kom hinsvegar í ljós að jonagold eplin voru öll saklaus og að fréttamennirnir höfðu í raun plantað inn svo öflugri vænissýki að flugumferðarstjórinn var farinn að póstleggja bréf til að vera öruggur um afhendingu stefnumarkandi leiðbeininga til flugstjóra.
Nú situr þessi maður í kraftgallanum útá Miklatúni og geltir að trénu á horninu. Rónarnir kvarta yfir röskun á svefnfrið og grenitréin eru við það að fella barrið af leiðindum.

Í morgun var eitt afskorið grenitré á leiðinni í vinnuna, ennfremur eru tvö stöðvunarljós, þrjár hættulegar beygjur, fjórir skólar, a.m.k fimm fyrrverandi kærustur og sex afbrýðisamir kærastar. Sjö stopp Dúndí druslur og átta einstæðar mæður (veit ekki hver á þessa sem er afgangs). Þarna er köttur sem ég er búinn að keyra níu sinnum yfir. Það eru 10 mínútna gangur metrar heiman frá mér í vinnuna. Á þessari leið eru ellefu hraðahindranir (samtals 1400 metrar). Það er meira en er í hindrunarhlaupi á ólympíuleikunum. Það er ekki séns að sætishitarinn eða miðstöðin fari að virka á þessari leið. Mér er kalt á morgnanna.

Góðar stundir
Langi Sleði

...forundran

2007-01-08T23:31:00.000Z

...stundum koma fréttir í sjónvarpinu og útvarpinu sem fá forundrunargeðsveiflurnar hans Langa Sleða á flug.
Sem dæmi um svona mál er kosningamálið "ókeypis leikskólar".
Hver hélt í alvöru að leikskólarnir yrðu ókeypis... rétt upp hendi?
Í staðinn fyrir að borga fyrir þitt/þín börn í stuttan tíma, borgarðu alla þína ævi! Frábær díll það!
Nýjasta forundranmálið kom hinsvegar fram í dag. Rannsókn sýndi fram á það að kynlíf dregur úr streitu!
Hvað í andskotanum eruð þið búin að vera gera ef að þið vissuð þetta ekki?
Mig grunar að það séu töluvert fleiri en ég með ógnarmagn af ostum í ísskápnum hjá sér. Fyrirtækjagjafir! Hvenær ætli ostur detti úr tísku og hvað kemur í staðinn? Ég giska á flísbuxur!

Æ ég þarf að fara að sofa, ætla að eldast í nótt!

Góðar stundir
Langi Sleði

...pest og lygi

2007-01-04T21:14:00.000Z

...Langi Sleði fagnaði áramótunum með því að vera umvafinn kvenfólki og líkamsvessum. Reyndar voru flestar konurnar komnar vel yfir fimmtugt, (sem hjálpar reyndar ekki sögunni) þar af leiðandi, eða öllu heldur, auk þess var hann eiginlega sá eini sem sá almennilega um framleiðslu líkamsvessa.
Langi Sleði fékk semsagt leiðinlega kvefpest sem er ekki að gera lukku í byrjun árs.
Þar sem Langi Sleði er á nýjum vinnustað, fannst honum frekar lélegt að mæta ekki í vinnuna þrátt fyrir flensuna. Því drattaðist hann í vinnuna, með álíka þétta slímslóð og maður getur ímyndað sér að 80 kílóa risasnigill dragi á eftir sér.
Syndandi augu leitandi að meðaumkun, drukknuðu í staðinn í burðarþolsteikningum og sendu frá sér ótvíræð skilaboð til heilans að þau vildu heim. Þar sem hvergi bólaði á meðaumkun skrifaði Langi Sleði að hann hefði misst auga og framan af tveimur fingrum í flugeldaslysi. Og viti menn... meðaumkun my way... "in a big way". Hins vegar ætlar flensan ekki að gefast upp. Nema að þetta sé í raun ofnæmi fyrir blómum, súkkulaði og samúðarkortum!

Góðar stundir
Langi Sleði

...þá hló Langi Sleði

2006-12-29T09:27:00.000Z

...en það var ekki af illkvittni, heldur skemmtanagildi hugans.
Örsagan hefst á Ölstofunni þegar Langi Sleði hitti litla bróður, ferðafljóðs. Þessi drengur er að stíga sín fyrstu stóru skref á skáldabrautinni þótt hann hafi lengi ort.
Þegar Langi Sleði innti hann eftir því hvernig gengi að yrkja, ... þá brást hann ókvæða við.

Góðar stundir
Langi Sleði

...og svo heita þetta fordómar!

2006-12-21T21:40:00.000Z

...fór í Bónus í kvöld. Ástandið var venjulegt. Fólk að slást um lélegt grænmeti. Að vísu var fólk búið að troða að meðaltali meiru í kerrurnar, ekkert annað. Ég heyrði fólk rífast um það að sleppa þvottaduftinu og kaupa í staðinn stóra dós af sælgætinu í marglitu bréfunum.
Þroskaheft stelpa bjó til neftóbak úr tveimur pokum af íslensku snakki frá Þykkvabæ, opnaði "óvart" stóran poka af skittles útum allt gólf... og hljóp þá af vettvangi... í einu vetfangi.
Toppurinn kom samt þegar Langi Sleði fékk hláturskast... eins og sumir þekkja.
Í gosdrykkjadeildinni, var svohljóðandi tilboð.

Kippa af kók og poki af Sambó lakkrískonfekti fylgir með.
Raunhæfur sparnaður.

...og svo segir fólk að þetta séu fordómar!
Þegar raunhæfi sparnaðurinn er kominn niður í það að eignast poka af lakkrískonfekti, þá er það ákkúrat tíminn til að endurskoða lífið.

Góðar stundir
Langi Sleði

...saga kærustunnar

2006-12-17T18:24:00.000Z

... Langi Sleði og fröken voru lukkuleg og hamingjusöm eins og sum kærustupör eru. Hamingjan hafði jafnvel borist út í það óeðlilega hegðun að við vorum búin að kaupa okkur samstæðar rúllukragapeysur... af því það var of hallærislegt að eiga samstæða krepgalla.
Eitthvað hafði hún verið afundin og hvumpin undanfarna daga og vegna þess var ég alls ekkert yfir mig hrifinn þegar hún bauð mér út að borða (má hugsanlega rekja til vannæringar sem er henni sjálfri að kenna).
Ég vissi alveg hvert þetta myndi leiða.
Það átti að dömpa mér á opinberum vettvangi, svo að ég myndi ekki verða mér til skammar.
...hrmpf...
Ég undirbjó mig vandlega, því hún var ekkert að fara!
Las galdrabækur um þá eiginleika sem ég vildi ná fram í henni og það snérist allt voða mikið um óskir, vonir og þrár.
Fallegar línur, rauða rúllukragapeysan, dugleg í eldhúsinu og svoleiðis hlutir voru mér greinilega efst í huga.
Ég hafði magnaðan seiðinn með mér á veitingastaðinn.
Eftir að hún kláraði rulluna um það hvað ég væri nú yndislegur og allt of góður maður... allt of góður fyrir hana, bað ég hana vinsamlegast bara um að hraðspóla áfram því að þessa ræðu hafði ég heyrt alltof oft.
Hún horfði mæðulega á mig og afsakaði sig til að fara á salernið. Ég notaði tækifærið og laumaði seiðnum í rauðvínsglasið hennar. Þegar hún kom til baka byrjaði hún að afsaka sig á milli þess sem hún sötraði vínið (gerir það alltaf þegar hún verður óstyrk þessi elska) ... actually heyrði ég ekki hvað hún var að tala um af því ég var of mikið að fylgjast með þeim dramatísku útlitsbreytingum sem áttu sér stað fyrir framan mig.
Þegar breytingarnar voru fullkomnaðar, var ég svona hálfvegis farinn að sjá eftir öllu saman, leiksoppur örlaganna.
Hún var orðin að kaffikönnu...
Allavegana... ég gat ekki skilið hana eftir og þetta er líklega fyrsta hjónamyndin okkar... ætli þær breytist nokkuð mikið úr þessu? Við erum í samstæðu rúllukragapeysunum.
En hún má eiga það... þetta eru flottar línur

Ég vil líka minna á það að tíminn til að skila inn tillögum að örnefnum fer að minnka.

Góðar stundir
Langi Sleði

...kvein

2006-12-11T19:40:00.000Z

...á laugardaginn eldaði eiginkona Langa Sleða, dýrindis nautalundir í bernaise sósu, með bökuðum kartöflum, gufusoðnum sykurbaunum og gulrótum í hvítlaukslegi.
Á sunnudaginn, fór hún svo eldsnemma út í kuldann, náði í bakkelsi í morgunkaffið og eldaði svo andabringur í villibráða/appelsínusósu.
Í kvöld hinsvegar var salatsamloka, egg og bollasúpa á boðstólum.
Nú leita ég logandi ljósi að fordæmisgefandi dómum um hegðun eiginkvenna í eldhúsi, þar sem ég held því fram að það sé ekki sanngjarnt að láta magann upplifa svona miklar sveiflur í fæðuvali.
Einu heimildirnar sem ég hef fundið eru geymdar í Árnasafni, á skinnbandi... Eldamennska í íslenskum torfbæjum.
Ég bind miklar vonir við að þetta rit leysi vandamálin mín og komi til með að leiða konuna á rétta braut.

Góðar stundir
Langi Sleði

...byrjunin

2006-12-07T20:25:00.000Z

...hér kemur mynd af veggnum eins og hann lítur út í dag.
Ég þakka fyrir nöfnin og setti inn nokkur sjálfur enn er hægt að koma með tillögur og hvet ég fólk til að halda nöfnum í styttri kantinum þar sem ég verð að skrifa frekar stórt.
Góðar stundir
Langi Sleði

...upphafið

2006-12-05T18:15:00.000Z

...það þekkja líklega flestir að þegar málun fer fram eru alls kyns leiðindavinna því meðfylgjandi.
Þegar Langi Sleði hreiðraði um sig í íbúðinni í hlíðunum, þá var spennan og fögnuðurinn slíkur að stundum virtist það koma niður á vinnubrögðunum.
Í forstofunni var gömul plastmálning tekin að flagna en hún náðist aldrei öll af. Stundum myndaðist því brún á milli málningarlaga, sem Langi Sleði nennti ekki að slípa niður.
Nú hef ég ákveðið að teikna upp þessa brún og eins og þið sjáið á myndinni, þá er þetta skemmtilegt landslag.
Ég ákveðið að gefa lesendum kost á því að nefna landsvæði. Hvort sem það er flói, fjörður, fjall, strönd eða hvað sem ykkur dettur í hug. Eina skilyrðið er að þetta særi ekki blygðunarkennd mína.
Hér er svo mynd af landinu með staðsetningarleiðbeiningum sem þið sendið mér um leið og þið óskið eftir hlutdeild í þessu verki.
Dæmi: Tanginn í J3 á að heita "ónefnt"
Góðar stundir
Langi Sleði

...gjörningur

2006-12-05T12:20:00.000Z

...verður framinn á heimili Langa Sleða í kvöld.
Myndbirtingar verða í kjölfar þess.
Mig grunar að loknum gjörningi þá muni ég þjást af kjánahrolli, þannig að ég er búinn að birgja mig upp af Strepsils og stórum teppum!
Þess ber að geta að lesendum verður gefinn kostur á að taka þátt.
Hvernig það fer fram kemur í ljós í kvöld.

Góðar stundir
Langi Sleði

...fánýti hluta

2006-12-04T23:30:00.000Z

...Langi Sleði hefur fyrir löngu síðan ákveðið að tjá sig ekki um pólitík á þessum miðli.
Þó virðist það vera að margir stimpli Langa Sleða sem harðan sjálfstæðismann og það hreinlega fer í taugarnar mínar.
Pólitík ætti að snúast um það að virða skoðanir annarra og því miður sé ég það hvergi. Sé ekki hvernig hægt er að ata aðra út í skít án þess að skítna mest sjálfur.
Hins vegar og að öðru... miklu skemmtilegra.
Sérfræðingsgen Langa Sleða er náttúrulega sterkast í því að fylgjast með fólki og það var ekki leiðinlegt á starfsmannaskemmtuninni.
Alls ekki.
Ein undurfögur snót er nýbyrjuð á vinnustaðnum og ákvað að sýna lit með því að mæta í jólaglöggið. Hins vegar virtust nær allir karlmenn hafa þá staðreynd að engu að hún væri í raun á föstu. Þetta leit út eins og að hænuunga hafi verið sleppt inn á Goldfinger og sá fyrsti sem næði honum, fengi ókeypis einkadans. Ég átti ekki orð.
Langi Sleði fékk náttúrulega allt öðru vísi athygli. Feita konan gerði sér óþægilega dælt og kjaftakona staðarins, mannaði sig loks upp í það að spyrja hvort Langi Sleði væri nú ekki bara ábyggilega hommi.
Gleði.

Góðar stundir
Langi Sleði

...undirskálar

2006-11-28T22:24:00.000Z

...samtal Langa Sleða og tveggja bræðra (þeir ásamt föður hans hafa allir unnið með Langa Sleða).

...
Langi Sleði: Já... og svo elti faðir ykkar mig bara á nýja staðinn.
Þeir: Já, þið eruð nú búnir að vinna ansi lengi saman.
Langi Sleði: Ég veit það en það var nú bara vandræðalegt þegar hann var farinn að hringja í mig einu sinni til tvisvar á dag bara til að láta mig vita að hann saknaði mín... Það bara gengur ekki!

Konan á milli þeirra var hlaðin pinklum og greinilega mikið að hlusta á samræður okkar.

Langi Sleði: ...og ekki batnaði það þegar hann mætti á staðinn... og í matartímum sest hann alltaf beint á móti mér og ... ég meina fólk er svo fljótt að fara að slúðra.

Nú var hún búin að snúa sér við og nennti ekkert að fela það lengur að hún væri íslensk líka.

Langi Sleði: ...svo finnst mér nú bara óþægilegt að hann sé alltaf að strjúka mér í vinnunni... hann er nú einu sinni giftur.

Konan var komin með augu eins og undirskálar.

Í þessu fékk Langi Sleði sms, ég tók upp símann, las skilaboðin og sagði svo hlæjandi: Hann pabbi ykkar er svo mikill daðrari!

Nú var ca helmingurinn af öllum fötunum sem konan hélt á, dreifður í kringum hana á gólfinu.

Það var þá sem sá eldri rankaði við sér og sagði: Má ég kynna konuna mína, Snæfríði!

Langi Sleði: Komdu sæl, Snæfríður.
Snæfríður: fnuuuuuhhhhhh.

Langi Sleði: Jæja strákarnir mínir, reyniði nú að haga ykkur skikkanlega og ég yrði agalega þakklátur ef þið fengjuð hann pabba ykkar aðeins til að róa gráa fiðringinn. Gaman að hitta þig líka Snæfríður!

Snæfríður undirskál: fnuuuuuuuuhhhhh!

Góðar stundir
Langi Sleði

...trrrrrrrrrrrrrrrrrrrrrr

2006-11-27T20:39:00.000Z

...Langi Sleði fór á framandi slóðir nú nýverið. Slóðir skálda og smörrebröðs, íslenskra kaupahéðna sem versla bæði fyrir milljarða og bankayfirdrætti.
Danmörk. trrrrrrrrrrrrrrrrrrrrrrrrr.
Ég reyndi nokkrum sinnum að eyða peningum á Strikinu en í hvert sinn heyrði ég Íslendinga hrópa og skipuleggja eins og þeir væru staddir í fremstu víglínu í orrustunni við Waterloo.
Við þann atgang hvarf ég inní mig, varð lítill í sálinni og langaði ekkert að versla.
Svo ég verslaði nánast ekkert, ákvað þess í stað að einbeita mér að trrrrrrrrrrrrrrrrrrrrrrr.
Afslöppun. Ég komst að því að ég var orðinn eins og upptrekkt leikfang, án nokkurs skemmtanagildis og skoppaði nú þess í stað um hliðargötur Kaupmannahafnar stefnulaust. trrrrrrrrrrrrrrrrrr.
Ég heimsótti mikið af múglistasöfnum sem flest hétu Smörrebröðsstofur, sat þar slappaði af og skrifaði af áfergju.
Hugmyndir dúndruðust niður svo ég rétt hafði ráðrúm til að skrifa þær niður, þar sem ég var einnig verulega upptekinn við að borða smörrebröð og trrrr.
Smám saman náði fjöðurin að slakna og ég var orðinn hann á ný... eða öfugt.
Næst segi ég ykkur frá drengjunum sem höfðu augu eins og undirskálar.

Góðar stundir
Langi Sleði

...tilbaka

2006-11-26T23:31:00.000Z

...Langa Sleða hefur borist kvörtun að internetið hafi verið óþarflega vanrækt og tómt undanfarið.
Hann mun því koma fram hér á þessari síðu á morgun í beinni útsendingu í súpermanbúningi.

Góðar stundir
Langi Sleði

...Kazakhstan 3

2006-11-10T00:23:00.000Z

...eða nei!
Þær krassandi sögur sem ég luma enn á verða einungis sagðar á milli laka.
Ástæðan er einfaldlega sú að ég verð að tryggja leynd kúnna.
Hins vegar, lyftist á mér brúnin þegar ég fór að versla í Nóatúni áðan. Fannst það mjög svalt að storma þarna inn með rauða handkörfu og fylla hana eingöngu af súkkulaði.
Rölti svo inn að grænmetisborðinu, þar sem jarðaberin voru og hitti þar móður, sem lá allhátt rómurinn, skamma 15 ára son sinn.
móðir: "ÉG BARA SKIL EKKERT Í ÞÉR!... HVAÐ VARSTU EIGINLEGA AÐ HUGSA?
sonur (í aumkunarverðum tón): "mamma!"
móðir: "ÞAÐ ER NÁKVÆMLEGA VANDAMÁLIÐ... ÞÚ VARST EKKI AÐ HUGSA, ÞÚ HUGSAR ALDREI ÁÐUR EN ÞÚ FRAMKVÆMIR!"...AÐ DETTA ÞETTA Í HUG!
sonur: "Það verða allir að byrja einhvern tímann?"
móðir: "ÞÚ SKALT EKKI TALA SVONA VIÐ MIG, GÓÐI MINN. ÞAÐ SEGIR MÉR ENGINN AÐ ÞAÐ SÉ EÐLILEGT AÐ VERA LÚBARINN Í FYRSTA TÍMANUM"
sonur: "ég skil ekki af hverju þú ert að æsa þig svona?"
móðir: "EF ÉG SÉ ÞIG EINHVERN TÍMANN NOTA SVONA TÆKONDÓR BRÖGÐ Á BRÆÐUR ÞÍNA, ÞÁ BORGAR ÞÚ MÉR HVERN EINASTA TÍMA TIL BAKA... OG ÉG HELD BÓKHALD VINUR!"
sonur: "þetta heitir tækwondó"
Ég horfði framan í drenginn sem leit út eins og pandabjörn, með tvö risastór glóðaraugu.
... og nærri missti súkkulaðikúlið. Smellti andlitinu ofan í vínberjaklasa og skalf af hlátri.

Góðar stundir
Langi Sleði.

...Kazakhstan 2

2006-11-03T00:15:00.000Z

...samtal Langa Sleða og pólverja með missjón.

Hann: Me get more money than you? Yes? Hahaha
Langi Sleði: Probably not!
Hann: Me get nearly threehundred thásand in ðe pokket! I get more? Yes!!!
Hann: Me work very hard, sometimes 300 háörs in ðe month, thats why I get so many money. There is nothing to do here but drink and work!
Langi Sleði: Ugh! How long have you been here?
Hann: I have been here since 2001 and now I'm rich!
Langi Sleði: Yes and are you going to live here?
Hann: No! I am going back to Poland in March! What am I going to do? I am already 31 and I have no woman. Only pappy!
Many problems will happen because I'm rich, women will come to me like flies. But you understand. You are also beautiful!
Langi Sleði: UUuugghhh!
Hann: Many problems my friend! I already have two apartments in Poland. I still must pay almost 20000 euros...
.... like flies..my friend!
like flies.

Góðar stundir
Langi Sleði

...Kazakhstan 1

2006-10-31T23:58:00.000Z

Samtal Langa Sleða og konu í hrefnuþyngdarflokkinum.

Hún: ...svo er árshátíðin að koma!
Langi Sleði: Nú er það já, hvar verður hún haldin!
Hún: Hótel Íslandi, þar var hún líka í fyrra ... og veistu hvað? Maturinn var ógisslegur!
Langi Sleði: "Í alvöru, verri en í mötuneytinu hér?" (Samkvæmt skilgreiningu Langa Sleða, féll maturinn í mötuneytinu undir fóður, ekki mat)
Hún: Já þetta var ömurlegt, voða pempíulegt eitthvað og alltof litlir skammtar!
Langi Sleði: Já, það er frekar leiðinlegt að fá ekki nóg að borða.
Hún: Já, en við vorum nú ekki lengi að redda því! Ég leigði mér hótelherbergi og við vorum nokkur sem fórum bara beint upp á herbergi að drekka og pöntuðum svo pizzur eins og við vildum alla nóttina!
Langi Sleði: (orðfár)
Langi Sleði: "Já, það er líklega ómögulegt að drekka í tóman maga".
Hún: "Ég ætla bara að vona að þetta verði betra núna, samt var ógisslega gaman!"

Góðar stundir
Langi Sleði

...útskýringar, afsakanir og Kazakhstan

2006-10-30T23:24:00.000Z

...sögulegar skýringar á sögulegri fjarveru minni eiga sér afsakanir, drauma og þrár. Þó að draumar og þrár komi yfirleitt afsökunum lítið við, þá verðið þið að viðurkenna að það passar ógnarlega vel þarna inn.
Hér verður gaman á næstunni því nú á ég ótal skemmtilegar sögur af fólki þar sem ég hef verið að vinna í Kazakhstan undanfarið.

Góðar stundir
Langi Sleði

...kjeddlingar

2006-10-22T21:32:00.000Z

...þar sem vinkona mín, spriklarinn skrifaði svo skemmtilega um klikkaðar konur, þá verð ég að slást í hópinn. Ef það er þá hægt er að tala um hóp í slíku tilfelli.
Langi Sleði var nefnilega á djörfum tíma á laugardagsmorgni á heimleið eftir ölæði og kvennafans.
Ég rölti rólega heim í næturkulinu og tók eftir því að gæði og ástand kvenna rýrnuðu eftir því sem ég nálgaðist Hlemm. Ég beygði upp Snorrabrautina og fyrir framan málverkastofu Péturs Gauts sat hnípin kona á steypustaut, sem er í raun gerður til að hindra umferð bíla. Nú hugsa sumir að þarna hafi Langi Sleði hitt draumadísina við fullkomnar aðstæður, en svo var ekki.
Á einhvern undarlegan máta hafði konan sofnað á þessum steypustaut.
Í fyrstu hugsaði ég: "Ætti ég að láta hana vera? ... Hmmm, á maður að skipta sér af svona?"
Langi Sleði: "Halló! Er allt í lagi?"
Engin viðbrögð, ég greip í öxl hennar og vakti hana.
Langi Sleði: "Er allt í lagi hjá þér?"
Kona: "ha, já,já. Ég er í lagi"
Langi Sleði: "Á ekki að koma sér heim? Þú getur bara lent í vandræðum með svona hegðun hérna!"
Kona: "jú, jú ég er að fara heim!" sagði hún og draup höfði á ný
Langi Sleði: "Vakna!" sagði ég og hristi hana rösklega.
Kona: "já, já ég er vöknuð" svaraði hún með drafandi röddu
Kona: "Viltu hjálpa mér heim?" spurði hún og byrjaði að grenja. Hún reyndi að standa upp og ég greip hana áður en hún datt í jörðina.
Langi Sleði: "Já ekkert mál, býrðu hérna rétt hjá?" (konan var ekki að fara að labba 5 metra af sjálfsdáðum)
Kona: "Já, ég er bara hérna rétt hjá!"
Langi Sleði: "Hvar býrðu?"
Kona: "Ásvallagötu!"
Ég setti konuna aftur á steypustautinn og sagðist skyldu hringja á bíl fyrir hana.
Kona (hágrátandi): "æi takk voðalega ertu góður við mig!"
Í stað þess að þurfa að hlusta á væl, spurði ég hvort að hún hefði skemmt sér vel fyrr í kvöld.
Kona: "Já, ég var í fertugsafmæli hjá vinkonu minni! Ofsalega gaman, fólk fór bara svo snemma heim" (enn grátandi).
Langi Sleði: "Nú, hvað er þetta!"
Allt í einu kikkaði helvítis kellingageðveikin inn.
Kona: "Farð þú bara, ég bjarga mér alveg!"
Langi Sleði: "Nei ég bíð með þér þangað til leigubíllinn kemur"
Kona: "Nei, nei... það er svo kalt úti...farðu bara!"
Langi Sleði: "Nei, mér er alls ekki kalt, ég er vel klæddur!"
Kona: "Hringdirðu á bíl?"
Langi Sleði: "Já, hann hlýtur að fara að koma"
Kona: "Þú hringdir ekkert á bíl! Þú ert bara að ljúga að mér! Hver ertu eiginlega?"
Langi Sleði: "Jú, jú, við bíðum bara róleg"
Kona(enn grenjandi): "Maðurinn minn, ég veit ekki hvað maðurinn minn á eftir að segja, hann verður alveg brjálaður)"
Ég hugsaði, annað hvort heldur hún að ég sé einhver helvítis níðingur eða hún er búin að vera að ríða einhverjum gömlum kærasta... og ég held að hún hafi ekki alveg verið í standi til þess. Hún heldur að ég sé níðingur!!

Sem betur fer kom leigubíllinn fljótlega og ég hélt nánast á konunni í bílinn.
Ég rölti hins vegar heim og hugsaði: "Þetta er ástæðan fyrir því að góðu strákarnir ná aldrei í góðu stelpurnar... Helvítis skrímsli búin að fokka í þeim og skemma í þeim sálirnar, svo þegar þær hitta okkur sem reynum að vera almennilegir! Þá halda þær að við séum perrar og níðingar!"
Andskotans, helvítis djöfulsins rassgat!

Þegar heim var komið byrjaði ég á því að fá mér snarl og endaði svo á heitri sturtu. Skreið svo nakinn, einn upp í rúm og hugsaði: "Það borgar sig örugglega einhvern tímann að vera góður"

Góðar stundir
Langi Sleði

...eins og Laulau í búðinni

2006-10-17T23:16:00.000Z

...var einhvern veginn það fyrsta sem mér datt í hug þegar ég tölti inn á efri hæðina á Sólon.
Þekkti aldrei Laulau í búðinni og veit í raun ekki hvort að hún hafi nokkurn tímann verið til!
Þekkti ekki heldur þetta fólk sem ég var að fara að hitta, tjahh nema suma, þekkti ég rétt rúmlega tæplega.
Settist niður við bloggaraborðið, var kynntur og kynnti mig.
Lagði fingurna á borðið og sagði: "Jahérna, þetta er bara eins og að vera heima hjá sér!"

Nema ég var í aðmírálsbúning...ekki á nærbuxum og netabol... eins og núna!

Afgangurinn skráist á spjöld sögunnar.
Kvöldið leið í rjómablíðu, allir í spariskapi!
Anna
Sápuópera
Spriklarinn
Beta
Beggi
Hugskot
Kalli
Hugi
Harpa
og öll þið hin. Takk fyrir frábært kvöld.

Góðar stundir
Langi Sleði

...partýgalli

2006-10-11T23:55:00.000Z

...í gærkvöldi hóf ég undirbúning við hamagang á Hóli.
Nánar til tekið grímuballið hennar Önnupúnkturis.
Byrjaði á því sársaukafyllsta við búninginn og var orðinn draghaltur eftir hálftíma. Og mikið djöfull var þetta vont. Síðan þá hef ég orðið var við mjög skrýtnar aukaverkanir eins og yfirgengileg þörf til að kaupa mér lepp... og jafnvel hef ég rennt hýru auga til páfagauka.
...en það er allt annars eðlis!
Nú gæti margur dregið þær ályktanir að ég hafi tekið vinstri fótinn af við hné og ætli mér að vera í búningi sjóræningja með tréfót, en svo er ekki.
Ég verð eitthvað allt allt annað sem bannað er að segja frá.

Góðar stundir
Langi Sleði

...slaufan

2006-10-09T21:15:00.000Z

...það er enginn annar heimur með færri tárum.
Ég stend á stöfum og orðum, horfi yfir lífsins landslag,
í algerri þögn.
Bælt engið, sýnir að hlátur og hlust hafi farið þar um og lent í átökum við orðanna vant.
Átök sem enduðu í algerri þögn.

Góðar stundir
Langi Sleði

...landið og miðin

2006-10-08T21:52:00.000Z

...allir vita að Finnland er vel þekkt sem þúsundvatnalandið.
Langi Sleði heimsótti í gær plánetuna Oliver, sem er einnig þekkt sem þúsundtímaljósabekkjalandið.

Góðar stundir
Langi Sleði

...gengisfelling íþrótta

2006-10-05T18:42:00.000Z

...sumar íþróttir eiga það til að falla í gengi, þegar maður umgengst byrjendur. Við það breytist æfing í leikfimi.
Sem er svona konu- eitthvað!

Góðar stundir
Langi Sleði

...vakandi augu!

2006-10-02T23:42:00.000Z

...vegna síðustu færslu Langa Sleða, hafa spurningar fyllt upp tómið, svona eins og árnar fylla upp lónið!
Það er nú svo að ef og ske skyldi, þá mætti vafalaust skrifa margar síður um samkvæmislíf Langa Sleða við hitt kynið.
Hins vegar er trúnaður vanmetinn og hér er hið sanna því aðeins ritað á milli línanna, í fullu samræmi við þennan svokallaða "fyrri daginn".
Langi Sleði ritaði því niður bók er bar heitið "15. september til 30 september". Langa Sleða datt í hug að henda svona handriti í ritstjóra, sem myndi þar af leiðandi gleymast, en uppgötvast sem meistaraverk að dögum mínum liðnum. Fyrsti ritstjórinn sagði þetta tvímælalaust eina beittustu háðsádeilu á íslenskt velferðarþjóðfélag sem hann hafði lesið. Bætti svo við að hann vildi endilega gefa þetta út sem fyrst! I qoute: "Loksins eignumst við okkar eigin 9/11". Þá datt mér í hug að skella þessu í þjóðskjalasafnið og láta það týnast þar innan um önnur ævintýri. Húsvörðurinn henti mér hins vegar út þegar hann kom að mér þar sem ég var að hefta ævintýrin mín, aftan við þjóðsögur Jóns Árnasonar. Sagði að svona fáránleiki væri úr öllum stíl við Jón Árnason. Benti mér hins vegar á að tala við H.C Andersen og Lewis Carrol (Lísa í Undralandi), er búinn að senda þeim báðum email og bíð í ofvæni eftir svari.

Góðar stundir
Langi Sleði

...hvað þá?

2006-09-25T20:05:00.000Z

...Þar sem sú stefna að elda dýrindismáltíðir ofan í tilvonandi húsfrúr og viðfang óra, hefur ekki verið að skila árangri, lagði Langi Sleði hugann í marineringu yfir nótt.
Að morgni dags sat ég svo uppi með þá hugmynd að ég væri að ryðjast um of inn á yfirráðasvæði kvenkynsins.
Á laugardaginn var svo generalprufa á þessari tilraun. Viðfangið kom ákkúrat á réttum tíma, ef dreginn er frá eðlilegur meiköpp tími. Hún mætti í glæsilegum gala kjól og í háhæluðum skóm. Ég hrærði saman tvær bollasúpur í ósamstæða bolla og setti fótboltann í gang. Hún fór á 38. mínútu fyrrihálfleiks. Sagðist hafa gleymt að þvo sér um hárið.
Ég hef nú ekki heyrt í henni síðan, en ég er samt enn vongóður.
Þetta hlýtur að ganga einhvern tímann upp... haldið þið það ekki?
Ef ekki... hvað þá?

Góðar stundir
Langi Sleði

...ég er svo

2006-09-20T20:14:00.000Z

...aldeilis bit.
Það kom mér ekki á óvart að það var enginn núlifandi stjórnmálamaður nefndur. Albert, sá eini íslenski sem var nefndur, höndlaði valdið líklega ekkert betur en hinir stjórnmálamennirnir. Sennilega munum við bara ver eftir hans bommertum!
Hins vegar...
Þá er það merkilegt í óspurðum fréttum að lögnin að eldhúsvaski Langa Sleða er búin að vera stífluð síðan á sunnudag. Það þýðir að hér hefur ekkert uppvask farið fram í nokkra daga. Rennslið úr vaskinum var það lítið að mig grunaði að þetta yrði skilgreind sem stífla af erfiðleikagráðu 3... að minnsta kosti. Því hannaði ég í huganum, yfirleitt rétt þegar ég var að sofna, afskaplega glimrandi græju sem átti að leysa stíflur af öllum gráðum.
Það var fyrst á miðvikudagsmorgun, sem ég leit inní eldhúsið og fylltist viðbjóði. Að vinnu lokinni fór ég beint í Húsasmiðjuna og keypti nokkra hluti sem ég þyrfti við smíði græjunnar.
Fyrsta skref var að hella stíflueyði í vaskinn og leyfa honum að virka.
Á meðan ætlaði ég að smíða græjuna.
Ég leitaði út um allt hús að verkfærunum mínum. Allt hús. 2 geymslur, heil íbúð og nákvæmlega öllu var snúið við.
Hvergi fann ég verkfærin. Þau voru jafn týnd og eldfærin í ævintýrum H.C Andersen!
Ég ákvað þá að hætta þessum tilraunum í kvöld, sem urðu reyndar bara raunir og taka uppvaskið með mér í sturtu.
Að lokum ákvað ég þó að hreinsa stíflueyðinn úr lögnunum með því að stútfylla vaskinn af sjóðheitu vatni. Viti menn, þá brast stíflan og lagnirnar soguðu vatnið til sín af áfergju.
Þetta er ein magnaðasta stífla sem ég hef lent í!
Stíflan lagði íbúðina í rúst, verkfærin hurfu og ég set uppi með óþarfa græju sem ég get ekki einu sinni smíðað.
Þessi stífla var semsagt skilgreind af erfiðleikagráðu 5.

Góðar stundir
Langi Sleði

...vald

2006-09-17T20:49:00.000Z

...er vandmeðfarið.
Reyndar er það svo að ég man ekki eftir einum stjórnmálamanni, sem hefur höndlað það vald sem honum hefur verið látið í té.
... og meginreglan, því meira vald, því stærri bommertur á fyllilega við í íslensku stjórnmálalífi.
Verð nú samt að viðurkenna að mér finnst stíll yfir því þegar heill flokkur tekur sig til og vendir seglum, þegar skútan er svotil sokkin.
Svona svipað og að kúka á sig íklæddur kafarabúningi. Sem er reyndar bæði fyndið og heillandi.
En svona í alvöru! Man einhver eftir stjórnmálamanni sem höndlaði valdið?

Góðar stundir
Langi Sleði

...skemmtilegra

2006-09-06T22:15:00.000Z

...Íslendingar töpuðu 0-2 fyrir Dönum í knattspyrnu í kvöld. Ekki skal deilt um það að Danir séu a.m.k. einum styrkleikaflokki fyrir ofan okkar íslensku stráka. Þrátt fyrir að dómarinn hafi gert sitt besta til að skemmta áhorfendum, með því að setja upp flautukonsert svipaðan og einleik Péturs Pan í töfraflautunni, þá dugði það ekki meira en svo en það rumdi illilega í mér þegar ég renndi mér í heita pottinn. Danska var algengasta tungumálið í mínu horni, ég forðaðist allan augnkontakt enda ekki í nokkru skapi fyrir háðsglott. Ég lyfti annarri buxnaskálminni og kúkaði í pottinn. Stakk íslenska fánanum (þessum snittufánum sem eru á tannstönglunum), á hann og lét hann reka í átt að Dönunum. Það varð náttúrulega uppi fótur og fit og þeir voru fljótir að láta sig hverfa. Nú hafði ég pottinn alveg fyrir mig einan og hugsaði: "Hahh... 2-1 er allavega betra en 2-0"

Góðar stundir
Langi Sleði

...skemmtilegt!

2006-09-06T19:30:00.000Z

... hugsaði ég þegar ég keyrði lítið sofinn fram hjá Ísaksskóla í morgun. Þar voru lítið sofnir foreldrar að selflytja börnin sín upp menntaveginn. Krakkarnir spriklandi af kæti, með fyrstu alvöru skólatöskuna.
það virtist nú samt vera frekar lítil þolinmæði í loftinu.
Ef ég hefði nú bara haft vit á því að mæta snemma og strá m&m á jörðina fyrir utan skólann, þá er ég viss um að þarna hefði ríkt stríðsástand.

Góðar stundir
Langi Sleði

...rangur titill

2006-08-31T22:00:00.000Z

...af biturri reynslu minni vildi ég ekki tjá mig á síðasta kommentakerfi. Ég á það nefnilega til, yfirleitt af vel yfirlögðu ráði, að segja nákvæmlega það sem má ekki segja!
Í þessu konusamfélagi virðist ég vera eins lífsseigur og kjaftasaga í saumaklúbbi, en í sama mund jafn dauðadæmdur og tourette sjúklingur í þjónaskóla.
Þannig er það nú bara og ég veit ekki af hverju!
En ég hafði afskaplega gaman af þessu og hló mikið!
Ég minntist á það um daginn að stundum væri það líkt og að grimm kona hafi lagt á mig álög (samanber bílavesenið). Nú hefur tekið sig upp verkur í baki sem leiðir fram í brjóst og öfugt. Því vil ég biðja þá sem lagði álög á mig að aflétta þeim hið fyrsta og bjóða fram nudd í sárabætur.

Góðar stundir
Langi Sleði

...allt slapp..t.

2006-08-23T23:26:00.000Z

...lystin og listin við að lifa kom mér ekki alveg í koll við Kollafjörð. Langi Sleði sótti bílinn sinn í dag og hann er alveg eins og hann á að vera...
Þegar heim var komið hringdi vinur Langa Sleða.
Vinur: Sæll og blessaður, hvað segirðu gott?
Langi Sleði: Sæll og blessaður, ég segi bara allt fínt en þú?
Vinur: Jújú, ég ákvað bara að hringja því að ég hef ekki heyrt í neinum síðan á Morrissey tónleikunum!
Langi Sleði: Já það var geðveikt.

Síðan komu nokkrar setningar sem aðallega snérust um klám og kynlíf með óæðri verum skrítnum tólum og einhverjum orðum sem jafnvel Langi Sleði skildi ekki....

Vinur: ...svo á ég ekki bara að droppa á þig? Eða ertu að gera eitthvað sérstakt?
Langi Sleði: Ehh, nei... ég ætlaði bara að fara að þrífa!
Vinur: Ó..., þá leyfi ég þér að þrífa í rólegheitunum.
.
.
.
Ég dottaði eitthvað eftir þetta og þreif svolítið líka. Fór að hugsa, hvað eru mörg ár síðan maður hætti að vera drepinn fyrir að segja svona? Þrjú, fimm, tíu ? Ég veit það ekki!
Kannski gerðist það á sama tíma og þið konurnar byrjuðuð að gera ykkur upp hausverk... Tók mig mörg ár að uppgötva að konur sem fá svokallað "kynlífsmígreni"... eru bara annars hugar!

Góðar stundir
Langi Sleði

...rækallinn

2006-08-21T22:42:00.000Z

Listaferð Langa Sleða hófst með prýði þennan fagra laugardagsmorgunn.
Vaknaði snemma og gerði hátíðarútgáfu Muellersæfinganna. Hlustaði á kveðjuræðu Halldórs í útvarpinu um leið og ég gæddi mér á nýbökuðu bakkelsi.
Útbjó mér nesti í sama stíl og valdi tónlist fyrir ferðina. Þetta yrði ævintýralega góð ferð.
Ég vissi svona nokkurn veginn hvaða staði ég ætlaði að heimsækja enda ekki í fyrsta sinn sem Langi Sleði leggur af stað í listaferð. Eftir að stað var komið fann ég fljótlega afskaplega skemmtileg myndefni og dundaði mér þar lengi vel í fögru veðri. Einhvern veginn leið mér afskaplega vel að vera laus við fólk og fjendur, valdi í dag fjöll og fé.
Allt var gott.
Brosti til sveitarinnar, skilta sem höfðu verið skotin í klessu, blindhæða og hættulegra beygja. Léttur andvarinn lék um túnin og stráin hneigðu sig niður vindinn eins og fagurlega skapað teppi. Þar til ég kom að síðustu blindhæðinni. Kölluð í daglegu tali blindhæðnin, þó ég hafi aldrei verið blindhæðinn, þá fannst henni eitthvað tilvalið að setja mark sitt á mitt.
Langi Sleði brunaði yfir stóran grjóthnullung sem dróst eftir undirvagninum með ískri og skrensi, þúmpi og banki. Það kviknaði snarlega á olíuljósinu og ekkert annað að gera en að stöðva bílinn. Einhver grjóthnullungur sem þetta helv. jeppapakk hafði skotið inn á veginn í einhverjum ofsaakstrinum. Andskotans.
Það þyrmdi yfir mér, en létti enn meira yfir sveitinni og nú sást hvergi ský á himni.
.
.
.
Já, ég var stopp og ekkert að gera nema að bíða eftir því að vera sóttur.
.
.
.
Nú er tilvalið að ég segi ykkur frá fyrri eiganda bílsins míns. Það kom mér mikið á óvart þegar ég sá að í bílnum var innbyggt segulbandstæki enda hef ég ekki séð slíkt, jahh... síðan ehhmm... árið 2000. Þegar ég hinsvegar uppgötvaði að fyrri eigandinn væri geðlæknir, féll þetta allt í réttar skorður. Þar sem hann hefur líklega stundað það að hlusta á sjúrnalana í og úr vinnu. Þetta þótti mér, á einhvern óeðlilegan hátt, afar vænt um.
.
.
.
Ég settist í farþegasætið og byrjaði að rita þessa færslu með annarri hendi, hina hendina hafði ég í segulbandstækinu, svona til hughreystingar. Hugsaði mikið um það af hverju ég gæti ekki átt einn einasta fullkominn dag í friði fyrir öllum öðrum. En ákvað svo að þessi barlómur minn næði nú örugglega ekki inn á topp 100 af því sem greyið bílsálin hafði þurft að heyra áður, svo ég þagði bara og setti John Coltrane í geislaspilarann.
.
.
.
Á sunnudagskvöldið kl 10. hringdi svo viðgerðarmaðurinn og tjáði mér að olíupannan hefði brotnað. Hann spurði mig hvort ég hefði nú örugglega náð að stöðva vélina nógu og snemma því þá hefði ég getað eyðilagt hana. Helvískur... Ég sofnaði ekki fyrr en kl 2 um nóttina, en þá var ég búinn að spyrja mig þessarar spurningar hátt í 3000 sinnum.
Á morgun kemur svo stóridómur. Nei eða já af eða á.
Hér er ein mynd af afrakstri dagsins.

Góðar stundir
Langi Sleði

...olíumafían

2006-08-19T19:58:00.000Z

...var ekki lengi að ná fram hefndum. Þeir höfðu samband við Vegagerðina sem stilltu upp grjóti á förnum vegi og ég tæmdi bílinn af olíu á 200 metrum.
Þið fáið að heyra betur af þessu á morgun, ég ætla að drekka bensínlitaðan vökva í kvöld og athuga hvort sambandið lagast ekki.
Líklega þarf ég að fara í Nornabúðina og athuga hvort Eva getur ekki galdrað einhvern verndarseið handa mér!

Góðar stundir
Langi Sleði

...olía

2006-08-17T22:41:00.000Z

...fékk til baka hluta af peningunum sem olíufélögin hafa stundað að stela af mér síðastliðin ár.
Borgaði 2 orkudrykki með 2þkr og fékk til baka eins og ég hafi verið að borga með 5þkr.
Hamingjusamur í hálfa stund.
Varð hinsvegar að mæta í vinnuna í dag en stefni á að eiga góðan frídag á morgun. List hefst, því list á sér líf.

góðar stundir
Langi Sleði

...frjósemi

2006-08-15T22:20:00.000Z

...getur birst í mörgum myndum. Þar sem lítið hefur farið fyrir henni hjá Langa Sleða undanfarið hef ég ákveðið að taka frí á fimmtudag og föstudag. Þessum tveimur dögum verður varið í frjósemisaðgerð. Ég ætla að búa til listaverk. Gróf hugmynd hefur þegar gerjast í mér eins og 10 lítra bjórkútur kominn yfir síðasta söludag.
Það kemur í ljós.
...kann hinsvegar góða lygasögu.
Þrír félagar Pétur, Viðar og Óskar, voru miklir vinir þegar þeir lærðu smíðar saman í Iðnskólanum. En eins og vinátta karlmanna endar yfirleitt, þá komst kona upp á milli þeirra. Hún var að læra auglýsingagerð. Það komst upp um hana eftir að hún hafði sængað til skiptis hjá Óskari og Pétri. Það eina sem gerðist var að þeir hættu að tala saman.
Hún er nú samt líklega enn að sofa hjá þeim báðum, allavegana er hún að semja slagorðin sem standa á vinnubílum þeirra beggja.

- Viðar og Óskar, yðar óskir í við! -

- Pétur, sem allt getur betur! -

Mig grunar, samt að hún sé ánægðari með hann Pétur!

Góðar stundir
Langi Sleði

...ó

2006-08-09T13:33:00.000Z

...stundum leyfum við aðstæðum í að þróast upp í það að það skilur heilu saumaklúbbana orðlausa.
Ein svona saga er til af kunningja Langa- Sleða. Maður sem gekk í gegnum óléttu-cravings með konunni sinni af áður óþekktri stærðargráðu. Át eins og... nei, það er ekki hægt að segja neitt um átið hans. Hinsvegar þegar hann gekk inn á fæðingadeildina, þá var hann settur í súrefni og var samstundis settur af stað. Afleiðingin varð sú að hann missti mátt í höndunum og í bríaríi keypti hann sér harmonikku. Seinna lét maðurinn taka af sér tærnar því honum var alltaf svo kalt. Sumir láta sér hinsvegar nægja að kaupa hlýrri sokka.

...og þá hafið þið það!

Á maður kannski að lifa lífinu þannig að ó-in, séu tíður gestur á vörum manns?
Láta vaða í hluti sem mann langar í, fela sig svo bakvið stundarbrjálæði eða ó. Það er allavegana merkilegra en að fela sig bak við brennivínið!
Skynsemin, á hún að hafa völdin?
Flestir myndu kannski segja að þetta ætti að vera hæfileg blanda af báðu! Hvernig er það hægt? Hélt alltaf að það væri annaðhvort eða!

Góðar stundir
Langi Sleði

...væntanlega

2006-08-03T00:05:00.000Z

...koma einhver orð að lokum.
Það er þó þannig að einhvern veginn, þá veit ég ekki alveg hvernig ég á að byrja!
Amma Langa Sleða er kjarnorkukona, þó kjarnorkan sé farin að dvína á nítugasta aldursárinu... og þó!
Við erum að tala um konu sem sparkaði upp hurðum ef henni sýndist svo og afi minn var ekki að tvínóna við hlutina þegar hann sá þá kosti sem hún hafði að bera... Umfram hurðatrikkið!
Amma er orðin svolítið völt á fótunum og um daginn datt hún og mjaðmagrindarbraut sig. Það hindrar hana þó ekki í því að halda áfram að búa ein.
Iss, hún þarf sko ekki að flytja!
Morguninn eftir mjaðmaaðgerðina, vaknaði hún, hálfvönkuð! Nikótínskorturinn var farinn að segja verulega til sín.
Langaamma: "æji, ég ákvað bara að hætta þessu!"
Langi Sleði: "já en að hætta reykja eftir 65 ár, fékkstu ekki fráhvarfseinkenni... viltu ekki plástra eða töflur eða eitthvað svoleiðis?"
Langaamma: "æji, nei nei, það er nú bara pjatt ég þarfnast þess ekkert"
...þessi kona hætti að reykja eftir 65 ár eins og ekkert væri auðveldara. Ég á æðislega ömmu!
Sem afleiðingar af þessari sígarettusögu, þutu milljón reykingasögur hjá á ljóshraða,

konan sem reykti vindla því hún saknaði þess að eiga ekki mann,

konan sem bruddi nikótíntyggjó eins og henni væri borgað fyrir það því að hún átti ekki mann til að dreifa athyglinni,

konan sem reykti eiginlega ekki sígarettur heldur bara pappír, því hún leit svo fjári vel og sexí út með sígarettu í hendinni, hún var líka að reyna að lokka til sín mann.

konan sem hætti að reyna að feika það að hún reykti opinberlega, því hún var svo upptekin við að reyna að lokka til sín mann.

konan sem byrjaði að reykja til að storka öllum náttúrulögmálum krabbameins.

Allar skrítnu sturturnar sem Langi Sleði hefur tekið að morgni dags til að þvo stybbu miðbæjarþokunar af líkamanum.

Annars held ég að ég verði að fara að finna mér nýjan sundtíma. Þroskahefta kærustuparið, er farið að hafa varanleg áhrif á kynhvöt mína, þar sem ég er upp undir 2 daga að jafna mig eftir óhuggulegheitin.

Af hverju heldur hann að hann þekki mig?

Góðar stundir
Langi Sleði

...stress og annað smálegt

2006-07-19T22:37:00.000Z

...er.
Langi Sleði heimsótti ölstaði borgarinnar um síðustu helgi. Á staðnum sem er skráður með 12% eiturlyfjanotkun, réðust tvær stúlkur, í sitthvoru tilvikinu, á þjóhnappa Langa Sleða. Líklega til að staðfesta að þetta væru afleiðingar æfinga, frekar en orsakasamhengið sem hlýst af pushups nærbuxum.
Á næsta stað ákvað ég því að halda kyrru fyrir og kom mér því fyrir í hægindum á barstól. Ég var fljótur að giska á u.þ.b. 20% eiturlyfjanotkun.
Ég vissi ekki fyrr en ókunnugur strákur er búinn að troða sér á milli lappa minna og horfði stíft á mig.!
Langi Sleði: ????
Strákur: Hæ!
Langi Sleði: Sæll!
Þögn, þrungi og stíft augnaráð varðveittu augnablikið.
Langi Sleði: Ef þú ert að reyna að komast á barinn þá ertu of fjarri honum núna! Ef þú ert hinsvegar að leitast eftir því að verða barinn, þá ertu mjög nálægt því núna!
Strákur: (þögn).... Ertu viss?
Langi Sleði: Já, ég er viss.

Að þeim orðum sögðum, fór hann.

Þessi vinnuvika er svo búin að líða í stressi og tímaskorti!
Ég hallaði mér í pottinn í Laugardalnum eftir pirring dagsins og viðraði í huganum, að ég þyrfti nú að fara að láta ykkur vita af mér.
Ætlaði að muna eftir að segja ykkur af brúnkunni minni. Sem ég er búinn að uppgötva að svipar mest til föl-ljósbláa litsins sem er málaður á botn heitupottanna.
Í afslöppun minni, sest svo kall ákkúrat á móti mér með þetta viðbjóðslega perraglott. Ég er ekki ofsamaður og kem mér hjá slagsmálum ef þess er nokkur kostur, en ég var byrjaður að hlæja að orðatiltækinu "að vaða í kallinn". Því ég var alveg að missa þolinmæðina!
Ég stóð upp og gekk að honum, með krepptan hnefa... sekúndubroti áður en hann hóf sig til flugs, fattaði ég að þetta heimskulega perraglott var ekkert nema alltof þröng sundhetta, sem togaði hálft andlitið til hliðar og upp.
Nú verð ég að fara að stunda afslöppun og aftöppun orku!

Góðar stundir
Langi Sleði

...fluga

2006-07-12T22:49:00.000Z

...réðst á mig í hádeginu! Ég sat úti í sólkróknum og skyndilega kom þessi litla húsfluga með læti og yfirgang. Eftir almenn leiðindi, tók hún meters tillhlaup og skallaði mig svo í ennið! Nú loksins skil ég máltækið, að fá flugu í höfuðið! Hún smitaði mig greinilega af einkennilegu fetishi sem olli því að ég fór eftir vinnu og keypti raftæki í verulegu magni.
Ég keypti nýja vekjaraklukku, ný heyrnatól fyrir mp3 spilarann og svo nýjan mjólkurþeytara. Fór svo í Nóatún, ráða-bæði og rænulaus... og kom út með uppþvottalög fyrir þvottavélar... og ég á ekki einu sinni þvottavél!
Það lærði ég nefnilega þegar ég fór til Ytkemiska institutet, á námskeið í "Surface and colloid chemistry in industry" að það er mörgum sinnum virkara heldur en gamla góða sápan, svo lærði ég slatta í viðbót sem ég segi ykkur ekki frá, nema að ég hafi ykkur fyrir framan mig, tjóðruð við stól!

Góðar stundir
Langi Sleði

...hugleiðingar

2006-07-11T00:36:00.001Z

...sumir virðast halda því fram að þegar Langi Sleði skrifar ekki, þá sé hann dapur!
Því er hins vegar ekki þannig, þó svo að margar færslur snúist yfirleitt um einhvern ákveðinn atburð, er færslan miklu frekar sú mynd sem kemur í huga þér. Hvort sem þér þykir færslan góð eða slæm, þá einhvern veginn fer heilinn í gang og starfar skyndilega sjálfstætt gagnvart aðstæðum, sem eru þér, lesandi góður, hugsanlega fullkomlega framandi. Það er einmitt þess vegna sem þessi heimur er svo skemmtilegur.
Það er hægt að líða í gegnum lífið, í skjóli umræðna um fréttir, veður og dagleg mál. Óafvitandi og skyndilega líður mannskepnan sofandi að feigðarósi, eins og skáldið sagði.
Dagarnir verða hverir öðrum líkari og enginn skilur neitt í því hvert allt "fönnið fór"!
Þetta líkamsræktarátaksheilkenni, sem helmingur þjóðarinnar virðist þjást af þessa dagana. Hve margir ætli séu þarna einungis til að vera meðal fólks. Hve margir eru þarna bara til þess að finna að þau séu til og lifi.
Slatti held ég. Mér var það nefnilega gjörsamlega framandi, þar til í dag, orsök þess að fólk velji það að hlaupa á einhverju bretti innandyra, þegar landið og miðin standa fólki til boða.
Nú í haust, ætla ég loksins að skrá mig í líkamsrækt. Búinn að ætla þangað lengi. Ég veit að ég á eftir að slasa mig á hlaupabrettinu togna í róðravélinni og tapa mér fyrir framan FM hnakkann með tattúin og pósurnar.
Ég bara get ekki beðið!

Góðar stundir
Langi Sleði

...gluggapóstur

2006-07-04T22:36:00.000Z

...er snilldin ein.
Nei, ég veit ég er bara að reyna að vera uppbyggilegur.
En Langi Sleði er bæði snillingur og séní og fann því lausn á því að losna við ALLANN gluggapóst af heimilinu.
Nú veit ég að þið sperrið bæði augu og eyru, til að heyra lausnina!
Lesið næstu línur af áfergju og ákveðið svo að mæla með mér sem næsta forseta Íslands. Lýðveldið tók ég út, því mér líkar það ekki. Kjósendum er því miður ekki treystandi fyrir því að velja sér forystusauð. Að hluta til er það vegna framboðs á forystusauðum og að hluta til vegna... annars.
Allavegana.
Þar sem margnefndur korsillettunágranni Langa Sleða býr á hæðinni fyrir ofan, þá hefur geymslan mín mengast af óhugnalegum hugmyndum. Reyndar eru allar geymslur yfirleitt þannig. Þar er bara drasl sem maður nennir ekki að henda.
Ég semsagt innréttaði geymsluna sem skrifstofu og nú fer ég með allan gluggapóst beint þangað upp. Því lýsi ég ríki mitt og varnarþing gluggapóstsfrítt svæði.
Hugsið ykkur bara hvað ég gæti gert sem forseti!

Góðar stundir
Langi Sleði

...löðrugglan

2006-07-04T08:55:00.000Z

... er verið að gera grín í þessari frétt!
Spurning hvort að það hafi verið löðr-ugglan sem sé einu fuglinn sem hafi orðið fyrir tjóni vegna þessa. Eitthvað kurr var þó í félagsmönnum, því er ekki að neita!

Góðar stundir
Langi Sleði

...speed dating

2006-07-03T23:05:00.000Z

...já hvað haldiði Langi Sleði fór á speed date. Með mynd af bílnum í vasanum, var ég tilbúinn til að takast á við hvað sem er.
Það hélt ég a.m.k.
Fyrst voru reglurnar kynntar, ekkert káf var eiginlega það sem stóð uppúr í þeirri kynningu. Alls voru þetta 10 konur og 10 karlar.
Kona 1.
Hún var eins spennandi og obláta á þriðjudagsmorgni. Hvorki viðeigandi né nokkuð annað. Ég man ekkert hvað hún sagði, eða hvort hún sagði nokkuð yfirleitt!
Kona 2.
Aðaláhugamál hennar voru raunveruleikaþættir, óskaði þess sérstaklega að taka þátt í brúðkaupsleiknum "Já". Það kom reyndar í ljós að hún var lesblind og hafði mislesið "speed wedding". Sem útskýrði fyllilega kjólinn sem hún var í, en mér leið samt frekar illa að hafa foreldra hennar líka þarna.
Kona 3.
Hún hafði með sér aukastól, það kom í ljós að hún vann hjá vita og hafnamálastofnun.... sem bauja! 3 mínútur eru stundum of lengi að líða. Eins og Annamín sagði við mig um daginn, maður veit það eftir 3 eða 30 sekúndur.
Kona 4.
Hún var utanað landi. Vantaði í raun bara vinnumann til að reka niður staura. Sagði að þetta væri, dásemdarlíf, sveitalífið. Hún var hinsvegar löngu hætt að stunda kynlíf en sagði að ég gæti fengið allt sem ég vildi úr mjólkunargræjunum á býlinu.
Note to self: hætta að drekka mjólk!
Kona 5.
Ég hef alltaf haft gaman af homer simpson, vil samt ekki giftast honum.
Kona 6.
Settist niður og tjáði mér að hún vildi strax byrja að eignast börn. Því hún væri sko ekkert að yngjast. Jamm og jæja, hugsaði ég. Það er nú ekki með öllu illt! Það var ekki fyrr en hún fór að sýna mér myndir af börnunum sínum 6 og eiginmönnunum 3 fyrrverandi sem það rann á mig "nei takk" gríman.
Kona 7.
Vissuð þið að ef þið googlið "strange men" þá fáið þið 341 þúsund niðurstöður, ef þið hins vegar googlið "strange women" þá fáið þið 422 þúsund niðurstöður! Þetta datt mér í hug að googla eftir að hafa hitt þessa konu. Held að hún sé ábyrg fyrir mismuninum!
Kona 8.
Hún var í raun nágranni minn (sjá fyrri færslu). Það sem var verst af öllu er að hann var ekki enn búinn að kaupa sér nýja hárkollu, og rakvélablaðið hans var orðið lélegt. Hann sagði að appelsínugula peysan mín væri hommalega ógeðsleg!
Kona 9.
Hún byrjaði á því að æla yfir mig allan. Drapst svo fram á borðið, áður en ég gat kynnt mig.
Kona 10.
Hún var best. Rétti mér whiský og sagði: Mér sýnist þú þurfa á þessu að halda! takk svaraði ég og dembdi þessu í mig í einum teig. Eitthvað heyrði ég að innifalið í þessum sjúss, væri nú að ég gæti alls ekki rukkað skipuleggjendur um hreinsun á jakkafötunum.
Ég veit ekki hvar ég á að finna þessar konur, það er allavegana ekki þarna!
Einhverjar hugmyndir???

Góðar stundir
Langi Sleði

...lýti

2006-06-22T23:24:00.000Z

...heyrði um daginn um að stelpur væru að flytja erlendis til að stækka karlmannamarkaðinn. Langi Sleði fór því í lýtaaðgerð í dag, svona til að stækka ...
ehh...
nei... miklu leiðinlegra en það...
...þetta var svona risvandamál.
Hér er gott að stoppa. Það er kannski kominn tími til að segja alla söguna, svona áður en ég verð stimplaður sem öryrki.
Fyrir u.þ.b. ári síðan fékk ég vogris í vinstri augabrúnina, sem hafði þær afleiðingar að fitukirtill stíflaðist. Ég var semsagt að láta gera við hann núna.
Mér þykir leiðinlegt að svekkja ykkur með því að vera ekki orðin hinn íslenski John Holmes og þó, kannski, ef til vill.

góðar stundir
Langi Sleði

...fréttir

2006-06-14T23:25:00.000Z

...um daginn fékk ég þau válegu tíðindi, að það væru fleiri sem ættu við offitu að stríða en þeir sem þjáðust af vannæringu.
Þessi þróun veldur mér einkum óhug, þar sem ...stórar konur, virðast vera sérstaklega veikar fyrir mér.
Eitthvað var mér farin að leiðast einveran um daginn og bauð því stúlku út að borða. Nema hvað, ég var staðráðinn í að nýta kosti mína til að ná athygli þessarar stúlku. Þegar á staðinn var komið, pöntuðum við huggulegan fordrykk í setustofunni og völdum þriggja rétta gúrme máltíð. Kvöldið hófst samt þannig að það var enginn sérstakur neisti, ekki eimur af því sem er kallað bál í sál. Eftir forrétturinn, var hún ekki bara farin að uppnefna mig, heldur sífellt að skamma þjóninn fyrir að neita að gefa henni símanúmerið sitt.
...ég var miður mín.
Ég flúði augnablik inn á salerni, svona til að hressa mig við og það var þá sem ég fór að kveikja á heilanum. Listir, bókmenntir, lífleg viðhorf á nútíma samfélag, dásemdir daglegs amsturs... virðist bara ekki vera að virka á konur þessa lands.
Kannski átti ég að kveikja á þessu, tíu árum fyrr.
Ég, sjálfur þurfti að taka á þeim breytingum, sem mér, greinilega, óafvitandi hafa orðið á lífinu í kringum mig.
Ég þurfti greinilega að nýta mér veikleika kvenna.
Ég fór inn til kokksins og afpantaði restina af máltíðinni hennar
og pantaði í staðinn, feitustu hrossabjúgu sem fundust í Reykjavík.
Eftir því sem hún át meira af bjúgunum, varð hún ástleitnari í minn garð. Ég veit ekki hvernig er hægt að skýra þetta, kannski er eitthvað "Langa Sleða ómótstæðilega-gen" í fitu. Hvað um það þetta svínvirkaði og þegar við vorum á leiðinni út, lamdi hún þjóninn fyrir að reyna að rétta sér símanúmerið sitt. Sagði að, svona hagaði fólk sér nú bara ekki!!!
Daginn eftir hugsaði ég, ef þetta eru örlög mín, þá er eins gott að taka á því af alvöru og karlmennsku.
Í gær seldi ég litla bílinn minn og keypti mér stóran fjórhjóladrifsbíl.
Maður verður jú að geta flutt þessar elskur!!!

Góðar stundir
Langi Sleði

...öðruvísi augu

2006-05-25T17:16:00.000Z

...eru farin að mæta mér á göngum vinnustaðarins.
Ekki þannig að ég hafi beðið andlegt skipbrot og vappi um nakinn eða illa til hafður, heldur er þetta tengt vorinu!
Sumir eru farnir að brosa, í sama hlutfalli við aukið birtustig og stefna ótrautt á stöðugt sólheimaglott á jónsmessunótt.
Aðrir eru bólgnir og rauðeygðir, annaðhvort vegna þess að myrkrið gleymdi að segja þeim að fara að sofa, eða að frjókornaofnæmið, er að ná nýjum hæðum samanborið við sterílíserað, umhverfi vetrarins.
Svo eru lítil óttaslegin augu farin að sjást. Sumarstarfsfólkið. Ég hélt reyndar fyrst að væri eitthvað tengt öskudagsskilgreiningunni eða foreldra/barna vinnudeginum. En svo var ekki!
Augun mín eru hinsvegar, misþreytt og með eða án sjónskekkjugleraugna.
Formáli sögunnar er í raun sá að ég man svo vel eftir því þegar maður var að byrja að vinna, fullt af gömlu skrítnu fólki, verkfræðingar með ullarbindi, sjálfir grárri en gráu jakkafötin og í stíl við svart-hvíta útsendingu frá 1975, allir eru einhvern tímann sumarstarfsmenn.

Ég var búinn að vera að vesenast í jarðskjálftahönnun, í gær! Kraftadreifing á stífa hlið versus gluggahlið, þar sem gera þyrfti grein fyrir mun meiri liðleika.
Það sem ég er að reyna að segja ykkur er að hausinn var staddur inní steinsteyptu mannvirki norður á Húsavík.
Áður en ég rölti í mat, tek ég venjulega af mér gleraugun, því einhverra hluta vegna finnst mér betra að borða gleraugnalaus.
Með stærðfræðihluta heilans algjörlega ofvirkan, settist ég niður fyrir framan sumarstarfsmann, pínulitla snót.
Allt í einu hugsa ég, sjónskekkja getur haft áhrif á fjarlægðarskyn, þar sem heilinn lærir ómeðvitað að kvarða fjarlægðir með því að bera saman myndir frá báðum augum, hlýtur mitt fjarlægðaskyn að vera brenglað, annað hvort núna eða þegar ég set upp gleraugun.
Ég leit á pínulitla sumarstarfsmanninn og gerði mér fullkomlega grein fyrir því að hún var ekkert lítil, hún var bara miklu fjær mér en ég hélt.
Svo ég hrópaði til hennar: "SÆL OG VELKOMIN TIL STARFA!" Greyið litla hrökk í kút, brotinni röddu hvískraði hún: "Takk", hoppaði svo niður af stólnum og trítlaði fjarleiðis. Þegar hún var komin í dyrnar, var hún samasem horfin.

Magnað þetta sjónskekkjudæmi hugsaði ég og lagaði ullarbindið.

Góðar stundir
Langi Sleði

...einhvern veginn

2006-05-22T23:52:00.000Z

...eru atvikin undanfarnar vikur ekki til þess fallin að skrifa um þau hér.
Þá fyrst, gerði ég mér grein fyrir því að ég hef treyst á mátulega lítil og ómerkileg atvik, til að fóðra hugarflugið. Blaðra stefnulaust um fáránleika hversdagsins. Sem er í sjálfu sér ágætt líka, því að lífið snýst kannski um að sjá litinn í smáu atriðunum.
Að hluta til.
En lífið markast ekki af þessum atburðum.
Það hefur nefnilega mikið gengið á undanfarið og þessi stóru atvik, skyggja einhvern veginn á allt annað.
Ég er í þungum þönkum.
Eins og finnarnir punkum pönkum... pallalla.
Kannski er finger pointing season að renna upp og þá er einmitt alfarsælast að halda að sér höndum.
En svona til að segja ykkur eitthvað lítið, þá fór ég í eurovision partý eins og alheimur nú á laugardaginn.
Þar hitti ég fyrir marga félaga og fólk sem ég þekkti ekki neitt.
Mér líst nú sjaldan illa á fólk við fyrstu kynni, en þegar miðaldra maður fer að djamma í Iron Maiden bol, þá kemur átómatískt smá bremsa á mig.
Þessi maður var ákafur stuðingsmaður Lordi.
Það var þó ekki fyrr en í stigagjöfinni sem hann fór að fara í taugarnar mínar. Hann öskraði allan tímann, eins og móðursjúk hýena. Ég settist út í horn og pældi í því hvernig ég gæti losnað við þetta viðrini, myndi hann elta köttinn út, ef ég klæddi hann í gúmmíhanska. Mér til ómældrar ánægju, hrópaði hann að lokum: "nú er ég farinn inn í bæ til að hrópa á alla sem eru ekki þungarokkarar... In your face". Það var ekki fyrr en þá að ég uppgötvaði að hann var hommi.
Brokeback mountain meets Priscilla and Lordi.
Ég var kominn heim kl 12.
Vona að ykkar partý hafi verið betra.

Góðar stundir
Langi Sleði

...Barbara

2006-05-13T22:32:00.000Z

...eins og tíðir lesendur vita er ég búinn að vera að deita Barböru Strepsils undanfarið.
Hún er búin að standa í gegnum þetta með mér, þessi elska og ég er farinn að læra á það hvenær hún er súr, sæt eða beisk. Núna liggur súra Barbara Strepsils útglennt á stofuborðinu mínu, spurning um að láta bara vaða...

Góðar stundir
Langi Sleði

...kvikindi

2006-05-11T22:17:00.000Z

...finnst ykkur ekki magnað hvernig lífið hefur þróast?
Upprunalega var guð kannski bara að skjóta hori á pláneturnar, sem myglaði svo og varð að einhverju sjávardýri á milljón árum ...og svo framvegis.
Upprunaleg rót þessara pælinga minna kviknaði kl 5 á mánudagsmorgni. Þegar býfluga, bankaði á innanverðan gluggann minn og vakti mig. Býfluga, sem var í raun miklu nær því að vera fugl, heldur en nokkuð annað.
Ég tróð kvikindinu inn í glas og henti því út og hélt áfram að sofa. Næsta morgun, var svipuð græja mætt aftur inn til mín, með sama fyrirgangi og látum, þannig að ég setti hana í glas og drekkti henni.
Þarnæsta morgun, var brjálaður geitungur mættur inn til mín, en honum tók ég ekki eftir fyrr en vaknaði og þá var hann búinn að stinga mig á tveimur stöðum í fótinn. Hann drap ég líka
Þessar flugur skýrði ég náttúrulega jane og john, þar sem þau voru feit, ljót, leiðinleg, heimsk og yfirgangssöm og því staðalímynd ameríkanans.
Ég veit ekki hvort samræði hafi átt sér stað á milli þeirra og að john hafi verið að hefna dauða jane, eða hvort að þetta hafi bara verið morgunúrillið hans. Allavegana þá kostaði þetta hann lífið.
Af hverju var ekki hægt að nota þessa einu heilasellu sem þau hafa, í að kenna þeim að forðast stærri verur, eða að rata út um glugga? Það finnst mér algerlega óskiljanlegt.
Lítum til dæmis á fiðrildin, sem ráða ekkert við vængina sína,... aldrei og fljúga út um allt eins og dömubindi með sjálfstæðan vilja, en eru öll fötluð og sveimhuga.
Ekkert er þó ömurlegra en húsaflugan sem aðeins samsett úr allt of stórum útlimum og virkar á mig eins og mongólíti flugnanna. Hún er reyndar sú fluga sem hefur sterkasta eitrið, en hún getur ekki bitið í gegnum mannshúð, það var þá tilgangur með eitrinu!
Svo nærist þetta pakk allt saman á sykri! Hvað skyldi íþróttaálfurinn segja við því?
hrmpf!

Góðar stundir
Langi Sleði

...ég gat ekki meir

2006-05-05T21:47:00.000Z

...svo ég hringdi í klipparann í dag
Langi Sleði: Sæll, þetta er ég, Langi Sleði! Ég veit að ég er að hringja í þig kl 4 á föstudagseftirmiðdegi og þú átt örugglega engan tíma til að taka á móti mér í dag. En ég varð að hringja, annars hefði ég orðið svo svekktur í kvöld út í sjálfan mig yfir því að hafa ekki hringt.
Klippari: Sæll Langi, ég á alltaf tíma fyrir þig. Það er laus tími kl 5.

Jeijj..

Ég var svo glaður og ánægður að vera á meðal fólks að
ég tók ekki eftir því að ég þurfti að bíða í 45 mínútur. Kannski var ég bara svona niðursokkinn í Sogið & Logið.

Hvað um það.

Þegar röðin kom að mér, var Bó Halldórs diskurinn loksins að klárast. Svo að hann ýtti aftur á play.

Þegar hann var að ljúka klippingunni tók hann svona bursta til að hreinsa burtu skornar hetjur, þá gaus upp þess viðbjóðslega skítafýla úr þessum úldna bursta. Allir iðnaðarmenn sem höfðu nokkurn tímann komið þarna inn voru nú að kitla mig í hálsinn.

Hvað um það.

Svo setti hann eitthvað vax í hárið á mér og ég var permanently kominn í smell hell.

Fyrir utan hitti ég kjarnafjölskylduna. Aldagamlan vin, við deildum meira að segja kærustunum. Sunddramadrottning, sem hann varð að gefa upp á bátinn, því hann var orðinn svo slæmur í hnjánum. Þríeykið var á leiðinni í sumarbústaðinn, fullhlaðin fjölskylda, brosandi framan í lífið.

Nú er það bólið fyrir mig, ég er gjörsamlega búinn.
Klukkan bara 11 á föstudagskvöldi.

Góðar stundir
Langi Sleði

...langavitleysa

2006-05-02T22:21:00.000Z

...á tímabili hélt ég að ég væri ósigrandi.
Krafturinn, velviljinn og fegurðin svo sterk að mér héldu engin bönd. Ég var á leiðinni að sigr... bjarga heiminum.
Það var þá sem ég skar mig á tómatahnífnum og mikið djöfull var það sárt.
Ég elska tómata.
Það er ekkert betra álegg til, nema hugsanlega ostur. Vinur minn skar sig einu sinni á ostaskera, en hann var náttúrulega ekki ofurhetja eins og ég.
Hehh.. Að skera sig á ostaskera.
Allavegana.
Aftur að ofurhetjutilburðunum.
Ég var virkilega, eftir margra ára streð orðinn konungur ríkidæmis míns, sem reyndar takmarkaðist af 4 veggjum heimilisins.
Ekki það að allt sem innan þessara veggja sé fullkomlega að mínu skapi í einhverju allsherjarplani. Langt því frá!
En ég var tilbúinn að útvíkka yfirráðasvæðið, þannig að ég skráði mig á dansnámskeið.
...
Meira af því síðar.
En það er bókstaflega ekkert sem ég get ekki gert, nema snert á mér tærnar. Strákar eiga að vera stirðir! Það er karlmannlegra. Það er í stíl við amerísku ofurhetjuna sem rekur öxi á bólakaf í hundrað ára gamalt tré. Eða íslenska sjóarann sem sefur brennivínsdauða í úldnuðum selskinnsgalla einhversstaðar nálægt skipi.
Þessir menn hafa aldrei þurft að vera liðugir. Það er kúl að vera stirð ofurhetja. Það er meiri saga, meiri hefð, í stirðleika.
Það er sterkara að vera stirður.

Góðar stundir
Langi Sleði

...aahtsjúhh

2006-05-01T21:35:00.000Z

...mengi hvítra bréfa á borðstofuborðinu stækkar í sama hlutfalli við þá gremju og óþolinmæði sem plagar mig þessa dagana.
Ég er búinn að sofa og snýta mér samfellt í fjóra sólarhringa og í stað þess að vera útitekinn og hraustur eftir helgina, er ég miklu nær því að vera með legusár.
Gef þessu kvefi 2-3 sólarhringa í viðbót, en skrifa eitthvað glatt og uppbyggilegt á morgun.

Góðar stundir
Langi Sleði

...tær

2006-04-26T22:06:00.000Z

...eins og af gömlum vana, skaga þær útundan teppi hér fyrir framan mig. Veit ekki hvað þeim hefur gengið til undanfarið en þær eru búnar að svitna látlaust síðan á sunnudag.
Líklega er þetta vorið, vökvun jarðar og framlenging lífs.
Já, ég held ég sé að skjóta rótum.

Alltaf þegar ég nota orðatiltækið "að gera grein fyrir" blómstra hendurnar út í fína krónu, sem 100 ára eplatré yrðu stolt af því að bera.
Í gær var ég svo kallaður vond og ómerkileg manneskja, ég gat náttúrulega ekki verið sammála þeirri greiningu.
Enda var ég tré!
...næstum því.!
Um helgina ætla ég að einbeita mér að því að laufga sálina með útiveru, auk þess að vera timbraður.

Góðar stundir
Langi Sleði

...af keyrslu

2006-04-24T23:47:00.000Z

...heilu mannsævirnar líða án þess að fólk opni augun og lykti af altumlykjandi lífi.
...heilu árin líða án þess að án þess að kona kyssi mann.
...heilu mánuðirnir líða án þess að fólk líti upp úr skólabókunum.
...heilu vikurnar líða án þess að fólk hneykslist á nokkrum hlut.
...heilu dagarnir líða án þess að fólk fari út fyrir hússins dyr.

Í dag, hélt ég áfram minni keyrslu.
Keyrslu sem er ekkert endilega í takt við nokkra aðra manneskju. Hún endaði hins vegar á því að ég bakkaði ofaní holu, með þeim afleiðingum að bíllinn festist í óendanlegri handbremsu.
Þess vegna sit ég hér, með hvítvínsglas og súkkulaði.
Aðallega er ég þó enn að keyra. Keyra í kappi við að klára þessa færslu áður en kertaljósið, súkkulaðið og/eða hvítvínið klárast.
Ég skilgreini þessa stund semsagt sem gæðastund.
Mér er hætt við því að gleyma því að eiga svona gæðastundir, því vil ég nota tækifærið til að minna ykkur, lesendur góðir, á að gera eitthvað gott, að tilefnislausu, í tilefni hversdagsins.

Góðar stundir
Langi Sleði

...af átu og ólifnaði

2006-04-20T22:56:00.000Z

...meltingakerfið mitt er búið að vera á stórhátíðataxta í rúma viku núna. Matarboð og veisluhöld upp á hvern einasta dag í rúma viku. Eðlilegasta leiðin væri væntanlega að skrifa sig frá þessu og segja ykkur frá matseðlinum upp á hvern einasta dag.
Hvað um það!
Kvöldið í kvöld toppaði hins vegar öll önnur kvöld.
Mér var boðið í kvöldverð með tveimur milljarðamæringum, í Perlunni. Ekki oft sem menn taka það sérstaklega fram að það sé ódýrt að borða þarna. Hvað um það, samt voru þetta venjulegir menn eins og þú og ég. Læstu sig úti og ... létu þjónana opna.
Allavegana, þeir buðu mér til sín í september, þá eru þeir komnir úr fríunum. Annar ætlaði í Karabíahafið, hinn ætlaði í
villuna sína í Ástralíu.
Get ég þá ekki sagt að ég eigi deit?
Ég veit að það verður ekki kynlíf, uppúr því deiti, nema hugsanlega með þjónustustúlkunum þeirra!

Á morgun hitti ég svo aðra útlendinga, þá á Sjávarkjallaranum. Þannig að það er ekki séð fyrir endann á veisluhöldum.
Þeir spurðu reyndar hvort að ég kæmi með konu með mér... hmm... Það gæti orðið svolítið magnað blind date!

Góðar stundir
Langi Sleði

...af ljósi

2006-04-16T01:10:00.000Z

...oft.
Er ég geng hjá glugga, grípa sjáöldur auga minna, spegilmynd. Af varkárni hef ég lært að taka henni eins og hún er.
Stundum segir hún mér aðeins að gluggarnir séu skítugir eða að ég þurfi að rétta úr bakinu en oftar endurvarpast minningar eða hugleiðingar.
Fyrir andartaki, kveikti ég á lampa sem stendur út í glugga. Í veðurbörðum rúðunum, lýstist upp andlitið og það var þá sem ég áttaði mig á því, hvernig ég ætti að segja ykkur frá trúnni.

Ég var alinn upp við það að biðja bænir fyrir svefninn, það var þó ekki þannig að fjölskyldan hafi verið tíður kirkjugestur. Það vorum við alls ekki. Í raun gerðist fátt í trúnni, fram að fermingu, við fermingu eða eftir fermingu. Það var ekki fyrr en nokkrum árum eftir fermingu, að ég, ákvað að gera tilraun og hætta að biðja bænir. Sjá hvort að það breytti einhverju í mínu lífi. Auðvitað mun ég aldrei vita, hvort sú hafi orðið raunin. En raunin varð hinsvegar sú að ég hætti að biðja bænir.
Fyrir nokkrum árum, veiktist ég svo heiftarlega. Enginn vissi hvað amaði að mér, en ég endaði á gjörgæslu með næringu í æð. Ég fór í röntgen og sneiðmyndatöku og magaspeglun og ég veit ekki hvað. Ekkert fannst. Þetta tók nærri tvo mánuði og aldrei fannst eitthvað að. En ég varð hræddur. Og þá dúkkaði blessaða barnatrúin upp og ég fór að biðja bænir.
Hvað er trúin mín þá annað en minn eiginn innri styrkur?
Trúi á Jesú Krist, hans einkason... Ég trúi á það sem hann stendur fyrir og þau mannlegu gildi sem hann boðar. Ég trúi á það sem ekki hefur enn úrelst. Ég stend við það að vilja vera góð manneskja.
Ég stend við það sjálf sem ég hef skapað með tímanum.
Ég á erfitt með að sjá hvað fermingin hefur umfram veisluna.
Það alltsaman finnst mér vera skrum.
Finnst ykkur öllum eðlilegt að 13-14 ára krakkar, skuli staðfesta kristna trú sína, í skugga sífellt stækkandi fermingagjafa?

Frænka mín fermdist um þessa páska og satt að segja veigraði ég mér við að mæta, því mér finnst fermingarveislan, vera miklu nær mammoni en nokkru öðru.
Það var þó ekki fyrr en í gær, á föstudaginn langa, sem ég varð ánægður með þá ákvörðun mína að mæta ekki.
Enginn skal dæma annars trú!
Því ætla ég ekki að dæma um annarra trú, ekki annarra en nágranna míns a.m.k. en hann flaggaði fullum fetum í sinni 15 metra háu flaggstöng.
Ætli hann hafi fermst?

Góðar stundir
Langi Sleði

...af bílamálum

2006-04-10T00:44:00.000Z

...kannski.

Of sætur, of ljótur, of mjór, of skrítinn, of hreinn, of beinn, of leiðinlegur, of skemmtilegur, of tilbúinn, of óþroskaður, of rangt, of rétt, of jafnlyndur, of mislyndur.
...
Er bara hluti af því sem ég hef heyrt í gegnum árin.

Því liggur það í augum uppi að ég ætla að kaupa mér van. Það verður þá a.m.k. ekki það sem er of.

Góðar stundir
Langi Sleði

...efadreginn

2006-04-08T20:14:00.000Z

...í gær gerði ég svolítið sem ég hafði ekki gert lengi!
Ég var búinn að þrá lengi að gera þetta aftur, því þetta er bæði gaman..., já og gott.
Það má eiginlega segja að ég hafi verið í bindindi.
Í dag er ég alveg búinn í höndunum, harðsperrur í upphandleggjunum og framhandleggjunum.
Ástæðan fyrir því að ég byrjaði á þessu aftur, var að stelpa í vinnunni, endurvakti þörfina.
Ég get nú ekki sagt að ég hafi haft mikið úthald en það kemur.

Góðar stundir
Langi Sleði

...fantafínt

2006-04-07T00:56:00.000Z

... Langi Sleði fór á fantafína tónleika með belgíska rokkbandinu dEUS í kvöld.
Hugsanlega var þetta líka aðalfundur hjá ýtu- og troðarafélagi Reykjavíkur. Einnig var raðað þannig í salinn að allir þeir sem höfðu afbrigðilega mikla athyglisþörf, óeðlilega litla pissublöðru og þjáðust af athyglisbresti. Voru allir fremst... eða aftast...yfirleitt voru þeir einhvers staðar á milli þessara tveggja pósta. Að hella bjór yfir tónleikagesti, enda ómögulegt að þurfa að drekka hann allan sjálf, þar sem þau myndu missa af tónleikunum.
Kannski voru þetta bara KR-ingar í píng-testi!

Góðar stundir
Langi Sleði

...dansnámskeið

2006-04-05T20:37:00.000Z

...undanfarna þriðjudaga er Langi Sleði búinn að sækja dansnámskeið.
Hálft byrjendanámskeið í samkvæmisdönsum enda erum við ekki alveg byrjendur. Við erum nefnilega séní.
Við ákváðum að allt hálfkák væri ókúl og ef við ætluðum að komast almennilega áfram í heiminum þá yrðum við að gera þetta eins og atvinnumenn.
Nú.
Fyrir fyrsta tímann, vorum við mætt 40 mínútum fyrr.
Kennarinn rak upp stór augu þegar við gengum í salinn, klyfjuð af farangri sem sæmdi frekar 5 manna fjölskyldu í tjaldferðalagi.
Við gengum rakleiðis til búningsherbergjanna og hófum undirbúninginn.
Við byrjuðum á því, kviknakin, að sprauta brúnkuspreyji á hvort annað
Það tók 10 mínútur, með þurrktíma. Latex- og pallíettugallinn, er náttúrulega sérsniðinn og það tekur 20 mínútur að koma sér í hann.
Næstu 10 mínútur einkenndust af panikki þar sem hárgreiðslan og meikið og málningin, var ekki að tóna við litina í búningnum, en það reddaðist.
Við tókum andköf, þegar við litum yfir salinn, fullum af meðaljónum, á gallabuxum og bol.

ég: Sjitt, erum við að mislesa stöðuna eitthvað?
hún: Nei, ég get ekki séð það!
ég: Það verða engin mistök leyfð í þessum tímum, ég heimta 100% einbeitingu!
hún: Já!
...og vitiði það. Það er engum blöðum um það að fletta, við erum betri en allur hópurinn. Við gerum engin mistök. Við erum séní.
Ég varð reyndar einu sinni að beita hana hörðu, þegar það var upprifjun á ræl. Þá raknaði dreifbýlisgenið í henni við sér og hún æddi um allan salinn eins og níræð amma í peysufötum á amfetamíni.
Þess vegna segi ég ykkur, leyndardóm lífsins, sem Björgólfur er reyndar búinn að uppgötva.
You can buy your way into success
Eða þannig.

Góðar stundir
Langi Sleði

..er það ekki merkilegt?

2006-04-02T03:24:00.000Z

...að sumir vita alls ekki að Langi-Sleði, gekk í MR. Aðrir vita það... og enn aðrir hefðu giskað á það.
Þið sem eruð þau, takk!
En það er ekki það sem ég vil segja ykkur hér drukkinn eftir djamm klukkan hálffjögur á laugardagsnóttu.
Það er svolítið annað.
Þetta er í fyrsta sinn sem ég hef óskað þess að hafa eyrun áföst pungnum, svona til að halda þeim hlýjum.
Nei, það var heldur ekki það sem ég ætlaði að segja ykkur.

Fókus, Langi, Fókus!
Kjarninn í þessari færslu er eftirfarandi.
Í MR, var eitt ritgerðarefni algengara en öll önnur.

"Aðgát skal höfð í nærveru sálar!"

Ég valdi það aldrei, hafði ekki þroska til þess og ég viðurkenni það fúslega.
En í dag...
Skil ég um hvað þetta snýst og þess vegna skrifa ég ekki um það.
Magnað hvað þversagnir og fordómar þvælast fyrir manni.

Góðar stundir
Langi Sleði